മലയാളികളുടെ പ്രിയ താരം ബേസില്‍ ജോസഫിന്റെ സൂപ്പര്‍ഹിറ്റ് യാത്രയ്ക്ക് ഇനി ആഡംബരം കൂടും.ബേസില്‍ ജോസഫിന്റെ ഗ്യാരേജിലേക്ക് പുതിയൊരു അതിഥി കൂടി. വോള്‍വോയുടെ ആഡംബര എക്‌സ്‌യുവിയായ എക്‌സ് സി 90യാണ് താരം സ്വന്തമാക്കിയത്.
ആഡംബരവും സുരക്ഷയും ഒരുപോലെ ഒത്തിണങ്ങിയ വോള്‍വോയുടെ ഫ്ലാഗ്ഷിപ്പ് മോഡലിന് ഒരു കോടി രൂപയ്ക്കുമുകളിലാണ് വില. കൊച്ചിയിലെ വോള്‍വോ ഷോറൂമില്‍ നിന്നാണ് താരം ആഡംബര എക്‌സ്‌യുവി സ്വന്തമാക്കിയത്. 300ബിഎച്ച്പി കരുത്തും 420എന്‍എം കരുത്തുമുള്ള ഹൈബ്രിഡ് വാഹനം ഏഴ് സെക്കന്‍ഡിനുള്ളില്‍ പൂജ്യത്തില്‍ നിന്നും നൂറ് കിലോമീറ്റര്‍ വേഗം കൈവരിക്കും. ഈ വര്‍ഷം സെപ്റ്റംബറിലാണ് വാഹനത്തിന്റെ ഫെയ്‌സ്‌ലിഫ്റ്റ് പതിപ്പിനെ കമ്പനി അവതരിപ്പിച്ചത്.
2022 ബേസിലിന് ഹിറ്റുകളുടെ വര്‍ഷമായിരുന്നു. ജയജയജയ ഹേ, പാല്‍തൂ ജാന്‍വര്‍, എന്നിങ്ങനെ നിരവധി ബേസില്‍ ചിത്രങ്ങളാണ് ഈ വര്‍ഷം ഹിറ്റ് ലിസ്റ്റുകളില്‍ ഇടംപിടിച്ചത്. മലയാളത്തിലെ ആദ്യ സൂപ്പര്‍ഹീറോ ചിത്രമായ മിന്നല്‍ മുരളിയുടെ സംവിധാനത്തിന് ഈ മാസം ഏഷ്യന്‍ അക്കാഡമി അവാര്‍ഡ്‌സില്‍ മികച്ച ഡയറക്ടര്‍ക്കുള്ള പുരസ്‌കാരവും ബേസില്‍ സ്വന്തമാക്കിയിരുന്നു.