യുവാക്കളുടെ ഹരമായി മാറിയ ഡ്യൂക്ക് 200ന്റെ 2023 എഡിഷൻ കെടിഎം ഇന്ത്യയിൽ പുറത്തിറക്കി.1.96 ലക്ഷം രൂപയാണ് ഷോറൂം വില. സൂപ്പർ ഡ്യൂക്ക് ആർ 1290ൽ നിന്ന് പ്രചോദനം ഉൾക്കൊണ്ടാണ് പുതിയ ഡ്യൂക്കിന്റെ രൂപകൽപ്പന.

പുതിയ ഡ്യൂക്ക് 200ൽ എൽഇഡി ഹെഡ്‌ലൈറ്റാണ് ഉൾപ്പെടുത്തിയിരിക്കുന്നത്. ബാക്കിയുള്ള ഫീച്ചറുകളെല്ലാം മുൻപത്തെ പോലെ തന്നെ നിലനിർത്തിയിട്ടുണ്ട്. സ്പ്ലിറ്റ് സീറ്റ്, ഹാൻഡിൽബാർ, ഫുട്‌പെഗുകൾ, സീറ്റിംഗ് പൊസിഷൻ എന്നിവ പഴയതുപോലെ ഉള്ളതിനാൽ റൈഡർ ട്രയാംഗിളിൽ പോലും മാറ്റമുണ്ടാകില്ല.

200സിസിയുള്ള സിംഗിൾ സിലിണ്ടർ, ലിക്വിഡ് കൂൾഡ് ബൈക്കിൽ സിക്സ് സ്പീഡ് ഗിയർബോക്സ് തന്നെയാണ് ഉൾപെടുത്തിയിട്ടുള്ളത്. 24.67 ബിഎച്ച്പി പവറുള്ള ഡ്യൂക്ക് ഇലക്ട്രോണിക് ഓറഞ്ച്, ഡാർക്ക് സിൽവർ മെറ്റാലിക് എന്നീ രണ്ടു നിറങ്ങളിലാകും നിരത്തുകളിലെത്തുക.

സ്പീഡോമീറ്റർ, ഓഡോമീറ്റർ, ട്രിപ്പ് മീറ്റർ, ടാക്കോമീറ്റർ, ഫ്യൂവൽ ലെവൽ ഇൻഡിക്കേഷൻ, ഗിയർ പൊസിഷൻ ഇൻഡിക്കേറ്റർ എന്നിവയെല്ലാം ഉൾപ്പെടുത്തിയിരിക്കുന്നത് എൽസിഡി സ്‌ക്രീനിലാണ്.