ആഡംബര ട്രെയിനിന്റെ ഉൾഭാഗത്തിന്റെ ചിത്രം പങ്കിട്ട് കേന്ദ്ര റെയിൽവേ മന്ത്രി അശ്വിനി വൈഷ്ണവ്‌. ജാക്ക് ആൻഡ് ജിൽ വെൻറ് അപ്പ് ദ ഹിൽ എന്ന നേഴ്സറി ഗാനത്തിന്റെ വരികൾ പങ്ക് വച്ച് ട്രെയിൻ ഏതെന്ന് ഊഹിക്കാമോ എന്ന ചോദ്യം മുന്നോട്ട് വച്ചായിരുന്നു മന്ത്രിയുടെ ട്വീറ്റ്.
നിരവധി പേരാണ് ട്വീറ്റിന് മറുപടിയുമായി രംഗത്ത് വന്നത്. കപൂർത്തല റെയിൽ കോച്ച് ഫാക്ടറി (ആർസിഎഫ് ) ഏറ്റവും പുതിയ നാല് വിസ്‌ഡം നാരോ ഗേജ്‌ കോച്ചുകൾ പുറത്തിറക്കിയതിനു പിന്നാലെയാണ് മന്ത്രി ആഡംബര ട്രെയിനിന്റെ ഉൾവശം പങ്ക് വച്ച് ട്വീറ്റ് ചെയ്തത്. അതിനാൽ കൽക്ക- ഷിംല റൂട്ടിലോടുന്ന ട്രെയിനിന്റെ കൊച്ചാണിതെന്നാണ് നിരവധി പേരുടെ മറുപടി
ഇന്ത്യൻ റെയിൽവേയുടെ തിരക്കേറിയ കോച്ചുകളുടെ ചിത്രങ്ങളും ചിലർ പങ്ക് വച്ചിട്ടുണ്ട്. ഭാരതത്തിലെ 95 ശതമാനം ജനങ്ങളും സഞ്ചരിക്കുന്ന മറ്റ്‌ തീവണ്ടികളുടെ അവസ്ഥയും പരിഗണിക്കണമെന്ന അഭ്യർത്ഥനയും ചിലർ പോസ്റ്റ് ചെയ്തിട്ടുണ്ട്.
കൽക്ക- ഷിംല റൂട്ടിലാണ് ഗ്ലാസ് മേൽക്കൂരയോടും വലിയ ജനാലകളോടും കൂടിയ പുതിയ ട്രെയിൻ യാത്രയാരംഭിക്കുക എന്നാണ് റിപ്പോര്‍ട്ടുകള്‍. കൽക്ക - ഷിംല ട്രയൽ റണ്ണിന് ശേഷമാകും പാതയിൽ ട്രെയിൻ ഓടിത്തുടങ്ങുക. 12 എസി എക്സിക്യൂട്ടീവ് സീറ്റുകളും 24 എസി ഷെയറുകളും, 30 നോൺ എസി സീറ്റുകളും പവർ സംവിധാനത്തോട് കൂടിയ ലഗ്ഗേജ്, ഗാർഡ് സൗകര്യങ്ങളും ട്രെയിനിലുണ്ട്.
കൽക്ക- ഷിംല പാത
ഹരിയാനയിലെ പഞ്ച്കുള ജില്ലയിൽ സ്ഥിതി ചെയ്യുന്ന മനോഹര സ്ഥലങ്ങളിൽ ഒന്നാണ് കൽക്ക. കൽക്കയിൽ നിന്ന് തുടങ്ങി ഇടുങ്ങിയ പാതയിലൂടെ സഞ്ചരിച്ച് 18 സ്റ്റേഷനുകളിലൂടെ കടന്ന് പോകുന്ന ട്രെയിൻ അവസാനം ഷിംലയിൽ യാത്ര അവസാനിപ്പിക്കും. ഈ യാത്രയിലെ ഏറ്റവും രസകരമായ അനുഭവം 1 ,143 .61 മീറ്റർ നീളമുള്ള ബാരോഗ് തുരങ്കത്തിലൂടെയുള്ള യാത്രയാണ്. 1903 ൽ ആണ് കൽക്ക- ഷിംല നാരോ ഗേജിന്റെ യാത്ര ആരംഭിക്കുന്നത്. ഇന്ത്യയിലെ വൈസ്രോയി ആയിരുന്ന കഴ്‌സൺ പ്രഭുവാണ് ഈ ട്രെയിനിലെ ആദ്യ യാത്രികൻ. 2009 ൽ കൽക്ക- ഷിംല റെയിൽവേ പാത യുനെസ്‌കോ അംഗീകരിച്ച ലോക പൈതൃക പട്ടികയിൽ ഇടം പിടിക്കുന്നത്. 103 തുരങ്കങ്ങൾ, 800 പാലങ്ങൾ, 919 വളവുകളും ഉൾപ്പെടുന്ന അതി മനോഹര സ്ഥലങ്ങളിലൂടെയുള്ള യാത്ര സഞ്ചാരികളുടെ ഇഷ്ട വിനോദ സഞ്ചാരയിടമാണ്.