9760 കോടി രൂപ മൂല്യമുള്ള 2000 രൂപ നോട്ടുകള്‍ നിക്ഷേപിക്കുകയോ മാറുകയോ ചെയ്തിട്ടില്ലെന്ന് വ്യക്തമാക്കി റിസര്‍വ് ബാങ്ക് ഓഫ് ഇന്ത്യ. നോട്ടുകള്‍ പിന്‍വലിക്കാന്‍ തീരുമാനിച്ച 2023 മെയ് 19-ന് പ്രചാരത്തിലുണ്ടായിരുന്നതില്‍ 97.26 ശതമാനം നോട്ടുകളും നിക്ഷേപിക്കുകയോ മാറ്റിവാങ്ങുകയോ ചെയ്തതായി ആര്‍ബിഐ അറിയിച്ചു.

അതേസമയം, 2000 രൂപയുടെ നോട്ടുകള്‍ നിയമപരമായി തുടരുമെന്നാണ് ആര്‍ബിഐ പത്രക്കുറിപ്പില്‍ വ്യക്തമാക്കുന്നത്.2000 രൂപ നോട്ടുകള്‍ പിന്‍വലിച്ചതായി പ്രഖ്യാപിച്ച 2023 മെയ് 19ന് വ്യാപാരം അവസാനിച്ചപ്പോള്‍ 3.56 ലക്ഷം കോടി രൂപയായിരുന്ന 2000 രൂപ നോട്ടുകളുടെ ആകെ മൂല്യം 9,760 കോടി രൂപയായി കുറഞ്ഞു.

രാജ്യത്തെ എല്ലാ ബാങ്ക് ശാഖകളിലും 2000 രൂപയുടെ നോട്ടുകള്‍ നിക്ഷേപിക്കാനോ മാറാനോ ആര്‍ബിഐ ജനങ്ങള്‍ക്ക് അനുമതി നല്‍കിയിരുന്നു.

അതിന്റെ പ്രാരംഭ സമയപരിധി സെപ്റ്റംബര്‍ 30 ആയിരുന്നു, പിന്നീട് അത് 2023 ഒക്ടോബര്‍ 7 വരെ നീട്ടി. 2000 രൂപ നോട്ടുകള്‍ മാറാനുള്ള അവസാന തീയതി ഒക്ടോബര്‍ 7-ന് അവസാനിച്ചു. എന്നാലും ആര്‍ബിഐയുടെ 19 ഓഫീസുകളില്‍ നോട്ടുകള്‍ മാറ്റാനുള്ള സൗകര്യം തുടരുകയാണെന്നാണ് ആര്‍ബിഐ വ്യക്തമാക്കുന്നത്.