എബ്രിഡ് ഷൈൻ- നിവിൻ പോളി കൂട്ടുകെട്ടിലിറങ്ങിയ ഹിറ്റ് ചിത്രം ആക്ഷൻ ഹീറോ ബിജുവിന്റെ രണ്ടാംഭാഗം വരുന്നു. ആക്ഷൻ ഹീറോ ബിജു 2 എന്ന് പേര് നൽകിയിരിക്കുന്ന ചിത്രത്തിന്റെ കാസ്റ്റിങ് ആരംഭിച്ചതായി നിവിൻ പോളി തന്നെയാണ് ഫേസ്ബുക്കിലൂടെ അറിയിച്ചത്.
കാസ്റ്റിങ് കോളിന്റെ പോസ്റ്റർ പങ്കുവച്ചായിരുന്ന നിവിന്റെ ഫേസ്ബുക്ക് പോസ്റ്റ്. "ബിജു തിരിച്ചെത്തി, കൂടുതൽ അപ്ഡേറ്റുകൾ ഉടൻ" എന്ന കുറിപ്പോടെയായിരുന്നു നിവിന്റെ ഫേസ്ബുക്ക് പോസ്റ്റ്. കഴിഞ്ഞ വർഷം ജൂലൈയിലാണ് ചിത്രത്തിന്റെ രണ്ടാം ഭാഗം വരുന്നുവെന്ന വാർത്തകൾ പുറത്തുവന്നത്.
"വെള്ളി വെളിച്ചത്തിൽ വരാതെ ഒളിച്ചുകഴിയുന്ന അഭിനയ കേഡികളെയും റൗഡികളെയും ഡീസികളെയും തിരയുന്നു. സ്വയം കണ്ടെത്തുന്നവർ ചിത്രങ്ങൾ സഹിതം ബന്ധപ്പെടുക" എന്നതാണ് പോസ്റ്ററിന്റെ ഉള്ളടക്കം. 20നും 50നുമിടയിൽ പ്രായമുള്ള സ്ത്രീകളെയും 20നും 55നുമിടയിൽ പ്രായമുള്ള പുരുഷന്മാരെയുമാണ് തിരയുന്നത്. സ്ത്രീകൾ ahb2castingfemale@gmail.com എന്ന മെയിൽ ഐഡിയിലും പുരുഷന്മാർ ahb2castingmale@gmail.com എന്ന മെയിൽ ഐഡിയിലുമാണ് വിവരങ്ങൾ പങ്കുവയ്ക്കേണ്ടത്.
വ്യത്യസ്ത മേക്കിങ് കൊണ്ടും താരങ്ങളുടെ സ്വാഭാവിക അഭിനയം കൊണ്ടുമാണ് 2016ൽ പുറത്തിറങ്ങിയ ആക്ഷൻ ഹീറോ ബിജു വൻ വിജയമായി മാറിയത്. ഒരു പോലീസുകാരന്റെ ദൈനംദിന ജീവിതമാണ് കഥ. എസ് ഐ ബിജു പൗലോസ് എന്ന കഥാപാത്രത്തെയാണ് നിവിൻ പോളി അവതരിപ്പിച്ചത്. കാര്യഗൗരവമുള്ള വിഷയങ്ങൾ നർമത്തിലൂടെ അവതരിപ്പിച്ചപ്പോൾ ചിത്രത്തിന് ഏറെ പ്രേക്ഷക പിന്തുണ ലഭിച്ചു. നിവിൻ പോളിയും എബ്രിഡ് ഷൈനും ഒന്നിച്ച രണ്ടാമത്തെ ചിത്രമായിരുന്നു ആക്ഷൻ ഹീറോ ബിജു.