കെജിഎഫിലൂടെ ഇന്ത്യൻ സിനിമ പ്രേമികളുടെ മനം കവർന്ന പ്രശാന്ത് നീലും ആർആർആർ എന്ന ചിത്രത്തിലൂടെ ലോകമെമ്പാടുമുള്ള സിനിമ പ്രേമികൾ ഏറ്റെടുത്ത ജൂനിയർ എൻടിആറും ഒന്നിക്കുന്നുവെന്ന് റിപ്പോർട്ട്. സലാറിന്റെ രണ്ടാം ഭാഗത്തിന് ശേഷം പ്രശാന്ത് നീൽ ഒരുക്കുന്ന ചിത്രത്തിലാണ് ജൂനിയർ എൻടിആർ നായകനാവുന്നതെന്നാണ് റിപ്പോർട്ട്.

ചിത്രം ഓഗസ്റ്റിൽ തുടങ്ങുമെന്നാണ് വിവിധ ദേശീയ മാധ്യമങ്ങൾ റിപ്പോർട്ട് ചെയ്യുന്നത്. ജൂനിയർ എൻടിആറിന് ഒപ്പമുള്ള ചിത്രവും രണ്ട് ഭാഗമായിട്ടായിരിക്കും ഒരുങ്ങുകയെന്നും റിപ്പോർട്ടിൽ പറയുന്നു. നിലവിൽ ദേവര എന്ന ചിത്രത്തിൽ ആണ് ജൂനിയർ എൻടിആർ അഭിനയിക്കുന്നത്.

കൊരട്ടാല ശിവ സംവിധാനം ചെയ്യുന്ന 'ദേവര'യും രണ്ട് ഭാഗങ്ങളായിട്ടാണ് ചിത്രീകരിക്കുന്നത്. ജൂനിയർ എൻടിആർ, സെയ്ഫ് അലി ഖാൻ, ജാൻവി കപൂർ, പ്രകാശ് രാജ്, ശ്രീകാന്ത്, ഷൈൻ ടോം ചാക്കോ എന്നിവരാണ് ചിത്രത്തിൽ ഉള്ളത്. ചിത്രത്തിന്റെ ആദ്യഭാഗം 2024 ഒക്ടോബർ 10-ന് തീയേറ്ററുകളിൽ എത്തും.

ഇതിന് പിന്നാലെ ബോളിവുഡ് ചിത്രമായ വാർ 2 വിലും ജൂനിയർ എൻടിആർ അഭിനയിക്കുന്നുണ്ട്. അയൻ മുഖർജി സംവിധാനം ചെയ്യുന്ന ചിത്രത്തിൽ ഹൃത്വിക് റോഷൻ , കിയാര അദ്വാനി എന്നിവരും പ്രധാന കഥാപാത്രങ്ങളെ അവതരിപ്പിക്കുന്നുണ്ട്. അടുത്ത വർഷം ഓഗസ്റ്റിലാണ് വാർ 2 തീയേറ്ററുകളിൽ എത്തുക.

അതേസമയം പ്രഭാസിനൊപ്പമുള്ള സലാറിന്റെ രണ്ടാം ഭാഗത്തിന്റെ പണിപുരയിലാണ് പ്രശാന്ത് നീൽ. 'സലാർ 2: ശൗര്യംഗ പർവ്വം' എന്ന് പേരിട്ടിരിക്കുന്ന രണ്ടാം ഭാഗം ഈ വർഷം അവസാനമോ അടുത്തവർഷം ആദ്യമോ റിലീസ് ചെയ്യുമെന്നാണ് സൂചന.