തിയേറ്റര്‍ റിലീസ് കഴിഞ്ഞ് രണ്ടു മാസം പിന്നിടുമ്പോള്‍ ഒടിടി റിലീസുമായി അജയ് ദേവ്ഗണ്‍- മാധവന്‍-ജ്യോതിക ചിത്രം ശെയ്ത്താന്‍. കാത്തിരിപ്പുകള്‍ക്കടുവില്‍ ഇന്ന് അര്‍ധരാത്രി നെറ്റ്ഫ്ലിക്‌സിലൂടെ ചിത്രം പ്രദര്‍ശനത്തിനെത്തും.
പോസ്റ്റര്‍ പങ്കുവച്ചാണ് ചിത്രം ഒടിടി റിലീസിന് തയ്യാറാകുന്ന വിവരം നെറ്റ്ഫ്ലിക്‌സ് ഇന്ത്യ അറിയിച്ചത്. തിയേറ്ററില്‍ സെയ്ത്താന്‍ കാണാന്‍ സാധിക്കാത്തവര്‍ക്ക് ഇനി സ്വസ്ഥമായി വീട്ടിലിരുന്ന് സിനിമ കാണാം.
ജിയോ സ്റ്റുഡിയോസും ദേവ്ദണ്‍ ഫിലിംസും ചേര്‍ന്ന് നിര്‍മിച്ച ചിത്രം മാര്‍ച്ച് എട്ടിനാണ് തിയേറ്റര്‍ റിലീസായത്. വിക്‌സ് ബഹലായിരുന്നു സംവിധായകന്‍. സൈക്കോളജിക്കല്‍ ത്രില്ലറാണ് ചിത്രം. കൃഷ്ണദേവ് യാഗ്നിക് തിരക്കഥ എഴുതി സംവിധാനം ചെയ്ത ഗുജറാത്തി ചിത്രം 'വശി'ന്‌റെ റീമേക്ക് ആണ് ശെയ്ത്താന്‍.
25 വര്‍ഷത്തിനുശേഷം ജ്യോതിക ബോളിവുഡിലേക്ക് എത്തുന്ന ചിത്രം കൂടിയായിരുന്നു ശെയ്ത്താന്‍. 1997-ല്‍ പ്രിയദര്‍ശന്‍ സംവിധാനം ചെയ്ത ഡോളി സജാ കെ രഹ്‌ന എന്ന ഹിന്ദി ചിത്രത്തിലൂടെയായിരുന്നു ജ്യോതികയുടെ ബോളിവുഡ് പ്രവേശനം. സജാ കെ രഹ്‌നയ്ക്കുശേഷം തമിഴ് സിനിമമേഖലയിലേക്ക് ചേക്കേറിയ ജ്യോതിക തമിഴ്‌ലോകത്ത് തന്‌റേതായ വ്യക്തിമുദ്ര പതിപ്പിക്കുകയും ചെയ്തു. 2001-ല്‍ ലിറ്റില്‍ ജോണ്‍ എന്ന ചിത്രത്തിലൂടെ അവര്‍ ബോളിവുഡിലേക്ക് തിരിച്ചെത്തി.
നിരവധി പോസിറ്റീവ് റിവ്യുകള്‍ സ്വന്തമാക്കിയ സെയ്ത്താന്‍ ഇന്ത്യന്‍ ബോക്‌സ്ഓഫീസില്‍ 140 കോടി സ്വന്തമാക്കി. സംവിധാകന്‍ വികാസ് ബഹല്‍ ചിത്രത്തിന്‌റെ വിജയത്തെക്കുറിച്ച് പറയുകയും അജയ് ജേവ്ഗണിന് നന്ദി അറിയിക്കുകയും ചെയ്തു. അമാനുഷിക ത്രില്ലര്‍ എന്നതിനെക്കാളുപരിയായി ഇമോഷണല്‍ ഫാമിലി ഡ്രാമയായാണ് ചിത്രത്തെ കാണാന്‍ ആഗ്രഹിക്കുന്നതെന്നും വികാസ് പറഞ്ഞു. മാധവന്‌റേത് അവിശ്വസനീയ പ്രകടനമാണെന്നും ഒരിക്കലും ഉദ്ദേശിക്കാത്ത തരത്തിലുള്ള ഘടകങ്ങള്‍ മാധവന്‍ കഥാപാത്രത്തിലേക്ക് കൊണ്ടുവന്നെന്നും ബോളിവുഡ് ഹംഗാമ ഉദ്ധരിച്ച് വികാസ് പറഞ്ഞു.