ആസിഫ് അലിയും സണ്ണി വെയ്നും പ്രധാന കഥാപാത്രങ്ങളാകുന്ന ചിത്രം 'കാസർഗോൾഡ്' നാളെ തീയറ്ററുകളിലെലെത്തും. 2018 ൽ പുറത്തിറങ്ങിയ ബിടെക്കിനുശേഷം ആസിഫ് അലിയും മൃദുൽ നായരും ഒന്നിക്കുന്ന രണ്ടാമത്തെ ചിത്രമാണിത്.
ഷൈൻ ടോം ചാക്കോ, വിനായകൻ, മാളവിക ശ്രീനാഥ്, ശ്രീരഞ്ജിനി നായർ എന്നിവരും അഭിനേതാക്കളായ ചിത്രത്തിൻ്റെ ഒഫീഷ്യൽ ട്രെയിലർ വലിയ പ്രതീക്ഷയാണ് പ്രേക്ഷകർക്ക് സമ്മാനിക്കുന്നത്.
സിദ്ദിഖ്, സമ്പത്ത് റാം, ദീപക് പറമ്പോൽ, ധ്രുവൻ, അഭിറാം രാധാകൃഷ്ണൻ, പ്രശാന്ത് മുരളി, സാഗർ സൂര്യ, ജെയിംസ് ഏലിയ തുടങ്ങിയവരും ചിത്രത്തിൽ അഭിനയിക്കുന്നുണ്ട്. മുഖരി എന്റർടൈയ്ൻമെന്റ്സുമായും യൂഡ്ലി ഫിലിംസുമായി സഹകരിച്ച് സരിഗമയാണ് ചിത്രം നിർ‌മിച്ചിരിക്കുന്നത്.
'കുറ്റവും ശിക്ഷയും' എന്ന ചിത്രത്തിനുശേഷം ആസിഫ് അലിയും സണ്ണി വെയ്നും ഒന്നിക്കുന്ന ചിത്രം എന്ന പ്രത്യേകതയും കാസർഗോൾഡിനുണ്ട്. വലിയ ഹിറ്റായി മാറിയ രജനീകാന്തിന്റെ ജയിലറിനുശേഷം വിനായകന്‍ മലയാളത്തിലെത്തുന്ന ചിത്രം കൂടിയാണ് കാസര്‍ഗോള്‍ഡ്. നെല്‍സണ്‍ സംവിധാനം ചെയ്ത ജയിലറിൽ വില്ലന്‍ വേഷത്തിലായിരുന്നു വിനായകന്‍ എത്തിയത്. വര്‍മനെന്ന വിനായകന്റെ കഥാപാത്രം വലിയ സ്വീകാര്യത നേടിയിരുന്നു.
തല്ലുമാലയിലൂടെ സെൻസേഷനായി മാറിയ സംഗീത സംവിധായകൻ വിഷ്ണു വിജയ് ആണ് കാസർഗോൾഡിന്റെ സംഗീതസംവിധാനം നിർവഹിച്ചിരിക്കുന്നത്.