വിജയ് ചിത്രം ലിയോ ലോകേഷ് സിനിമാറ്റിക് യൂണിവേഴ്സിൽ നിന്നുള്ളതാണോ എന്നതാണ് ആ ചിത്രത്തിന്റെ ഏറ്റവും വലിയ സസ്പെൻസുകളിലൊന്ന്. പ്രഖ്യാപനം മുതൽ ഇതുവരെയുള്ള ഹൈപ്പ് നിലനിർത്തുന്നതും ഈ സസ്പെൻസ് കൂടിയാണ്. എന്നാൽ ഇത് മന്ത്രി ഉദയനിധി സ്റ്റാലിൻ പൊളിച്ചെന്നാണ് ആരാധകരുടെ വാദം

കഴിഞ്ഞ ദിവസം പ്രിവ്യൂ ഷോ കണ്ട മന്ത്രി ഉദയനിധി സ്റ്റാലിന്റെ ട്വിറ്റർ പോസ്റ്റാണ് സസ്പെൻസ് പൊളിച്ചത്. ദളപതി വിജയ് അണ്ണന്റെ ലിയോ ഗംഭീര ചിത്രമാണെന്നും മികച്ച സംവിധാനം, മികച്ച സംഗീതം എന്നിങ്ങനെയുള്ള പോസ്റ്റിൽ ഉദയനിധി എൽസിയു കൂടി ഹാഷ്ടാഗ് ആയി ചേർത്തിട്ടുണ്ട്. ചിത്രം ലോകേഷ് സിനിമാറ്റിക് യൂണിവേഴ്സിൽ നിന്നുള്ളതായതിനാലാണ് മന്ത്രി എൽസിയു ഹാഷ് ടാഗ് ഉപയോഗിച്ചതെന്നാണ് ആരാധകരുടെ കണ്ടെത്തൽ

ചിത്രം നാളെ തീയേറ്ററുകളിലെത്തും. കേരളത്തിൽ മാത്രം 700 സ്ക്രീനുകളിലാണ് പ്രദർശനം . കേരളത്തിൽ പുലർച്ചെ നാലിനാണ് പ്രദർശനം ആരംഭിക്കുക. തമിഴ്നാട്ടിൽ രാവിലെ 7 ന് എങ്കിലും ഷോ ആരംഭിക്കാൻ അനുവദിക്കണമെന്ന നിർമാതാക്കളുടെ ആവശ്യം സർക്കാർ പരിഗണിച്ചില്ല. പുലർച്ചെ നാലുമണിക്കുള്ള ഷോ അനുവദിക്കണമെന്ന നിർമാതാക്കളുടെ ആവശ്യം മദ്രാസ് ഹൈക്കോടതിയും കഴിഞ്ഞ ദിവസം തള്ളിയിരുന്നു. സുരക്ഷ കാരണങ്ങൾ ചൂണ്ടിക്കാട്ടിയാണ് മദ്രാസ് ഹൈക്കോടതി ഹർജി തള്ളിയത്.രാവിലെ 9 മണിക്കാണ് തമിഴ്നാട്ടിൽ ലിയോ റിലീസ്