പ്രേക്ഷകർ ഏറെ ആകാംഷയോടെ കാത്തിരിക്കുന്ന ദുൽഖറിന്റെ കിങ് ഓഫ് കൊത്തയുടെ ഏറ്റവും പുതിയ അപ്ഡേറ്റ് പുറത്ത്. വിവിധ ഭാഷകളിലായി റിലീസിനൊരുങ്ങുന്ന ചിത്രത്തിന്റെ തമിഴ് ടീസർ ചിമ്പുവും തെലുങ്ക് ടീസർ മഹേഷ് ബാബുവും റിലീസ് ചെയ്യും. നമ്മ സത്തം ഇന്ത വീക്ക് എക്സ്ട്രാ വാ ഇറുക്കും ( ഈ ആഴ്ച ഞങ്ങളുടെ ശബ്ദം കൂടുതൽ മുഴങ്ങി കേൾക്കും) എന്ന കുറിപ്പോടെ ദുൽഖർ തന്നെയാണ് ഇക്കാര്യം സോഷ്യൽ മീഡിയിലൂടെ പുറത്തുവിട്ടത്

ബുധനാഴ്ചയാണ് ചിത്രത്തിന്റെ ടീസർ റിലീസ്. കഥാപാത്രങ്ങളെ പരിചയപ്പെടുത്തി കൊണ്ട് കഴിഞ്ഞ ദിവസം പുറത്തുവിട്ട മോഷൻ പോസ്റ്ററും ഏറെ ശ്രദ്ധിക്കപ്പെട്ടിരുന്നു

ഹിറ്റ് മേക്കർ ജോഷിയുടെ മകൻ അഭിലാഷ് ജോഷി സംവിധാനം ചെയ്യുന്ന ചിത്രമാണ് കിങ് ഓഫ് കൊത്ത. കുറുപ്പിന് ശേഷം ദുൽഖർ നായകനായെത്തുന്ന ചിത്രം മലയാളത്തിന് പുറമെ തമിഴ് , തെലുങ്ക് , കന്നഡ, ഹിന്ദി പതിപ്പുകളിലായിട്ടാണ് റിലീസ് ചെയ്യുക. ഐശ്വര്യ ലക്ഷ്മിയാണ് ചിത്രത്തിലെ നായിക. കുറുപ്പിന്റെ ഛായാഗ്രാഹകൻ നിമീഷ് രവിയും അരവിന്ദ് എസ് കശ്യപും ചേർന്നാണ് ക്യാമറ

ഓണം റിലീസായി തീയേറ്ററുകളിലെത്തുന്ന ചിത്രം കേരളത്തിൽ മാത്രം ഇരുനൂറിലേറെ സ്ക്രീനുകളിലും, ആഗോളതലത്തിൽ ആയിരത്തിലധികം സ്ക്രീനുകളിലും ഒരുമിച്ച് റിലീസ് ചെയ്യാനാണ് തീരുമാനം