സംവിധായകൻ ഒമർ ലുലുവിനെതിരെ എക്സൈസ് കേസെടുത്തു. ഇന്ന് റിലീസായ ഒമർ ലുലു ചിത്രത്തിലെ ട്രെയ്‌ലർ രംഗങ്ങളിൽ ലഹരി ഉപയോഗം പ്രോത്സാഹിപ്പിക്കുന്നു എന്ന പരാതിയിലാണ് കേസ്. എൻഡിപിഎസ്, അബ്കാരി നിയമങ്ങൾ ചുമത്തി കോഴിക്കോട് എക്‌സൈസാണ് കേസ് എടുത്തിരിക്കുന്നത്. ചിത്രത്തിന് സെൻസർബോർഡ് എ സർട്ടിഫിക്കറ്റ് നൽകിയിരുന്നു.
നവംബർ 19നാണ് ചിത്രത്തിൻ്റെ ട്രെയ്‌ലർ പുറത്തു വന്നത്. കോമഡി എൻ്റർടെയ്നർ വിഭാഗത്തിലുള്ള ചിത്രത്തിലെ നായകനായി എത്തുന്നത് ഇർഷാദ് അലിയാണ്. ഒമർ ലുലുവും ചിത്ര എസും ചേർന്നാണ് ചിത്രത്തിന് തിരക്കഥ ഒരുക്കിയിരിക്കുന്നത്. നൂലുണ്ട വിജീഷും, ഷാലു റഹീമും, പ്രധാന വേഷങ്ങളിൽ എത്തുന്ന ചിത്രത്തിൽ അഞ്ച് പുതുമുഖങ്ങളാണ് നായികമാര്‍ എന്നതും പ്രത്യേകതയാണ്.
ചിത്രത്തിൻ്റെ ട്രെയ്‌ലർ ലോഞ്ചിൻ്റെ ദിവസം കോഴിക്കോട് ഹൈലൈറ്റ് മാളില്‍ പ്രശ്നമുണ്ടായിരുന്നു. നടി ഷക്കീല പങ്കെടുക്കാനെത്തിയപ്പോൾ മാള്‍ അധികൃതര്‍ പ്രവേശനാനുമതി നിഷേധിച്ചതായിരുന്നു വിഷയം. തന്റെ പുതിയ ചിത്രത്തിന്റെ ട്രെയ്‌ലർ ലോഞ്ചിന് അതിഥിയായി ഷക്കീല എത്തുന്നതിനെ മാള്‍ അധികൃതര്‍ എതിര്‍ത്തെന്നും അതിനാല്‍ പരിപാടി നടത്തേണ്ട എന്ന് തീരുമാനിക്കുകയായിരുന്നുവെന്നും ഷക്കീലയ്‌ക്കൊപ്പം ഫേസ്ബുക്ക് ലൈവിലെത്തിയ ഒമര്‍ പറഞ്ഞിരുന്നു.