ഫഹദ് ഫാസില്‍ കേന്ദ്ര കഥാപാത്രമായെത്തുന്ന ഏറ്റവും പുതിയ ചിത്രമായ ' ധൂമ'ത്തിന്റെ ഫസ്റ്റ്‌ലുക്ക് പോസ്റ്റര്‍ പുറത്ത്. പ്രേക്ഷകര്‍ക്കിടയില്‍ തരംഗമായി മാറിയ കെജിഎഫിന്റെ നിര്‍മ്മാതാക്കളായ ഹൊംബാലെ ഫിലിംസാണ് ചിത്രം നിര്‍മ്മിക്കുന്നത്. ഫസ്റ്റ് ലുക്ക് പോസ്റ്റര്‍ പുറത്തുവിട്ട് ഹൊംബാലെ ഫിലിംസ് തന്നെയാണ് പ്രഖ്യാപനം നടത്തിയത്. അപര്‍ണ ബാലമുരളിയാണ് ചിത്രത്തില്‍ നായികാ വേഷത്തിലെത്തുന്നത്.
കന്നഡ സംവിധായകനായ പവന്‍ കുമാറാണ് ധൂമത്തിന്റെ തിരക്കഥയും, സംവിധാനവും നിര്‍വഹിക്കുന്നത്. ഒക്ടോബര്‍ ഒമ്പതിന് ചിത്രീകരണം ആരംഭിക്കുന്ന ചിത്രം അടുത്ത വര്‍ഷമാണ് റിലീസിനെത്തുക. മലയാളത്തിന് പുറമേ തമിഴ്, കന്നഡ, തെലുങ്ക് എന്നീ ഭാഷകളിലും ചിത്രം റിലീസ് ചെയ്യും. പ്രമുഖ താരങ്ങളെയും സാങ്കേതിക പ്രവര്‍ത്തകരെയും അണിനിരത്തിയുള്ള ബിഗ് ബജറ്റ് ചിത്രമായിരിക്കും ധൂമമെന്നും, ചിത്രത്തില്‍ മാസ് റോളിലാണ് ഫഹദ് എത്തുകയെന്നും അണിയറ പ്രവര്‍ത്തകര്‍ അറിയിച്ചു.
ഹൊംബാലെ ഫിലിംസിന്റെ ബാനറില്‍ വിജയ് കിരഗന്ദുര്‍ ആണ് ചിത്രം നിര്‍മ്മിച്ചിരിക്കുന്നത്. നേരത്തെ പ്രഖ്യാപിച്ച ടൈസണ്‍ എന്ന ചിത്രത്തിന് ശേഷം മലയാളത്തില്‍ ഹോംബാലെ ഫിലിംസിന്റെ രണ്ടാമത്തെ ചിത്രമായിരിക്കും ധൂമം.