കേരള രാജ്യാന്തര ചലച്ചിത്രമേളയുടെ മൂന്നാം ദിനത്തിൽ മത്സരവിഭാഗത്തിലെ നാല് ചിത്രങ്ങളടക്കം 64 ചിത്രങ്ങളാണ് പ്രദർശനത്തിനെത്തുക. ബൊളീവിയയിലെ മലയോര പ്രദേശത്ത്‌ താമസിക്കുന്ന ദമ്പതികളുടെ കഥ പറയുന്ന 'ഉതമ', ഫിറാസ് ഖൗരി സംവിധാനം ചെയ്ത ടുണീഷ്യൻ ചിത്രം 'ആലം', മൈക്കൽ ബോറോഡിന്റെ റഷ്യൻ ചിത്രം 'കൺവീനിയൻസ് സ്റ്റോർ' ഐഡൻ ഹേഗുൽ സംവിധാനം ചെയ്ത ഇസ്രായേലി ചിത്രം 'കൺസേൺഡ് സിറ്റിസൺ' എന്നിവയാണ് മത്സരവിഭാഗ ചിത്രങ്ങൾ.

ലോകസിനിമ വിഭാഗത്തിൽ ലിയോൺ പ്രുഡോവ്സ്‌കിയുടെ മൈ നെയ്ബർ അഡോൾഫ്, പ്രക്ഷുബ്‌ധമായ ഒരു അച്ഛൻ മകൾ ബന്ധത്തിന്റെ കഥ പറയുന്ന വാലെന്റിന മൗറേൽ ചിത്രം ഐ ഹാവ് ഇലക്ട്രിക് ഡ്രീംസ്, പലസ്തീൻ ചിത്രം ബിറം തുടങ്ങിയ 29 സിനിമകളാണ് പ്രദർശിപ്പിക്കുക. തത്സമയ പശ്ചാത്തല സംഗീതത്തോടെ അവതരിപ്പിക്കുന്ന ദി പാർസൺസ് വിഡോ, അലഹാന്ദ്രോ ജോഡ്രോവ്സ്കിയുടെ ദി മോൾ എന്നിവയും പ്രദർശനത്തിനുണ്ട്.

ആദ്യ രണ്ടുദിനങ്ങളിലും നിറഞ്ഞ സദസിലായിരുന്നു ചിത്രങ്ങളുടെ പ്രദർശനം . പ്രദർശനമുള്ള എല്ലാ തീയേറ്ററുകളിലും വലിയ പ്രേക്ഷകപങ്കാളിത്തമാണുള്ളത്.

നിശാഗന്ധിയിൽ ഇന്ന് രണ്ടു ചിത്രങ്ങളാണ് പ്രദർശിപ്പിക്കുക. റൊമേനിയൻ ചിത്രം ആർ എം എൻ, അമേരിക്കൻ ചിത്രം ദ വെയ്ൽ . നിശാഗന്ധിയിൽ പ്രദർശിപ്പിക്കുന്ന ചിത്രങ്ങൾക്ക് റിസർവേഷൻ ഇല്ലെന്നതും പ്രത്യേകതയാണ്