ആരാധകർ ഏറെ ആകാംഷയോടെ കാത്തിരിക്കുന്ന ചിത്രങ്ങളിൽ ഒന്നാണ് തങ്കലാൻ. വിക്രമിനെ നായകനാക്കി പാ രഞ്ജിത്ത് സംവിധാനം ചെയ്യുന്ന ചിത്രത്തിനെ കുറിച്ചുള്ള ഓരോ അപ്‌ഡേറ്റും സോഷ്യൽ മീഡിയയിൽ വൈറലാവാറുണ്ട്. തങ്കലാന്റെ റിലീസ് തിയതി പുറത്തുവിട്ടിരിക്കുകയാണ് അണിയറ പ്രവർത്തകർ.
ജനുവരി 26 നാണ് ചിത്രം റിലീസ് ചെയ്യുക. ചിത്രത്തിന്റെ ടീസർ നവംബർ ഒന്നി കേരളപ്പിറവി ദിനത്തിൽ പുറത്തുവിടും. വ്യത്യസ്ത ലുക്കിൽ ചിയാൻ വിക്രം എത്തുന്ന ചിത്രത്തിൽ പാർവതി തിരുവോത്തും മാളവിക മോഹനുമാണ് നായികമാരായി എത്തുന്നത്.
പശുപതി, ഹരി കൃഷ്ണൻ, അൻപു ദുരൈ, പ്രീതി കരൺ, മുത്തുകുമാർ തുടങ്ങിയവരാണ് മറ്റുപ്രധാനകഥാപാത്രങ്ങളെ അവതരിപ്പിക്കുന്നത്. നീലം പ്രൊഡക്ഷൻസും സ്റ്റുഡിയോ ഗ്രീനിന്റെ ബാനറിൽ കെ ഇ ജ്ഞാനവേൽ രാജയും ചേർന്നാണ് നിർമാണം.
കെ യു ഉമാദേവി, അറിവ്, മൗനൻ യാത്രിഗൻ എന്നിവരുടെ വരികൾക്ക് ജിവി പ്രകാശ് കുമാറാണ് സംഗീതം ഒരുക്കിയിരിക്കുന്നത്. കർണാടകയിലെ കോലാറിൽ പത്തൊമ്പതാം നൂറ്റാണ്ടിൽ നടന്ന കഥയാണ് ചിത്രത്തിന് ആധാരം. ചിയാൻ നായകനാവുന്ന 61-ാം ചിത്രമാണ് തങ്കലാൻ.
തമിഴ് പ്രഭയും പാ രഞ്ജിത്തും ചേർന്നാണ് ചിത്രത്തിന്റെ തിരക്കഥ. അഴകിയ പെരിയവൻ സംഭാഷണവും എ കിഷോർ കുമാർ ഛായാഗ്രഹണവും നിർവഹിക്കുന്നു. കലാ സംവിധാനം എസ് എസ് മൂർത്തി.