ബ്ലോക്ബസ്റ്റർ ചിത്രം കെജിഎഫിലൂടെ ഇന്ത്യൻ സിനിമാ ലോകത്തെ ഇളക്കി മറിച്ച ഹോംബാലെ ഫിലിംസ് കോളിവുഡിലും സാന്നിധ്യമറിയിക്കാനെത്തുന്നു. കീർത്തി സുരേഷ് നായികയാകുന്ന 'രഘു താത്ത' എന്ന ആദ്യ തമിഴ് ചിത്രത്തിന്റെ ഔദ്യോഗിക പോസ്റ്റർ ഹോംബാലെ ഫിലിംസ് പുറത്തുവിട്ടു. 'കാരണം വിപ്ലവം വീട്ടിൽ നിന്നാരംഭിക്കുന്നു' എന്ന അടിക്കുറിപ്പോടെയാണ്‌ പോസ്റ്റർ സോഷ്യൽ മീഡിയയിൽ പങ്കു വെച്ചിരിക്കുന്നത്.
സുമൻ കുമാറാണ് ചിത്രത്തിന്റെ രചനയും സംവിധാനവും നിർവഹിക്കുന്നത്. ഫാമിലി മാൻ എന്ന ജനപ്രിയ പരമ്പരയുടെ രചയിതാവായ സുമൻ സംവിധായകനായി അരങ്ങേറ്റം കുറിക്കുന്ന ചിത്രം കൂടിയാണിത്. ഹോംബാലെ ഫിലിംസിന്റെ ബാനറിൽ വിജയ് കിരഗണ്ടൂരാണ് ചിത്രം നിർമിക്കുന്നത്. കാന്താരയാണ് ഹോംബാലെ ഫിലിംസ് ബാനറിൽ അവസാനമായി പുറത്തിറങ്ങിയ ചിത്രം.
ഒരു യുവതി തന്റെ ദേശത്തിന്റെയും ജനങ്ങളുടെയും ഐഡന്റിറ്റി സംരക്ഷിക്കാനായി നടത്തുന്ന യാത്രയിൽ കണ്ടെത്തുന്ന സന്തോഷത്തിലൂടെയും രസകരമായ മുഹൂർത്തങ്ങളിലൂടെയുമാണ് കഥയുടെ പുരോഗതി. 'ഒരു ഗ്രാമത്തിൽ ഒരു കർഷകൻ രഘുതാത്ത' എന്ന അടിക്കുറിപ്പോടെ കീർത്തി സുരേഷും പോസ്റ്റർ പങ്കുവെച്ചിട്ടുണ്ട്.
എം എസ് ഭാസ്‌കർ, ദേവദർശിനി, രവീന്ദ്ര വിജയ്, ആനന്ദ്സാമി, രാജേഷ് ബാലകൃഷ്ണൻ എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നുണ്ട്. ചിത്രം 2023 ന് തിയേറ്ററുകളിൽ റിലീസ് ചെയ്യും. യാമിനി യജ്ഞമൂർത്തിയാണ് ചിത്രത്തിന്റെ ഛായാഗ്രഹണം. ഷോൺ റോൾഡനാണ് സംഗീതം.
പ്രഭാസിനൊപ്പം പൃഥ്വിരാജ് അഭിനയിക്കുന്ന 'സലാറാ'ണ് ഹോംബാലെ ബാനറിൽ റിലീസ് ചെയ്യാനിരിക്കുന്ന ചിത്രം. പൃഥ്വിരാജ് നായകനാകുന്ന 'ടൈസൺ' എന്ന ചിത്രവും ഹോംബാലെ പ്രൊഡക്ഷൻസ് തന്നെയാണ് നിർമിക്കുന്നത്. മലയാളത്തിന് പുറമെ കന്നഡ, തമിഴ്, തെലുങ്ക്, ഹിന്ദി ഭാഷകളിലും ചിത്രം റിലീസ് ചെയ്യും. ഫഹദ് ഫാസിലും അപർണ ബാലമുരളിയും പ്രധാന കഥാപാത്രങ്ങളെ അവതരിപ്പിക്കുന്ന ‘ധൂമം’ എന്ന ചിത്രവും ഹോംബാലെ നിർമിക്കുന്നുണ്ട്.