പ്രിഥ്വിരാജിന് പിന്നാലെ ഇന്ദ്രജിത്തും സംവിധാന രംഗത്തേക്ക് കടക്കുന്നുവെന്ന് വാർത്തകൾ പ്രചരിച്ചിരുന്നു. പ്രിഥ്വിയെ പോലെ തന്നെ മോഹൻലാലിനെ നായകനാക്കിയാകും ഇന്ദ്രജിത്തും ചിത്രമൊരുക്കുകയെന്നും ഔദ്യോഗിക പ്രഖ്യാപനം ഉടൻ ഉണ്ടാകുമെന്നും പ്രചാരണമുണ്ടായി. എന്നാൽ ഇതിൽ സത്യമില്ലെന്ന് ഇന്ദ്രജിത്ത് തന്നെ വ്യക്തമാക്കി

വാർത്തയിൽ വസ്തുതയില്ലെന്ന് ഒടിടി പ്ലേയോടാണ് ഇന്ദ്രജിത്ത് പറഞ്ഞത്. നിലവിൽ ജീത്തു ജോസഫ് സംവിധാനം ചെയ്യുന്ന റാമിൽ മോഹൻലാലിനൊപ്പം നിർണായക വേഷം ചെയ്യുകയാണ് ഇന്ദ്രജിത്ത്. തൃഷ ,സംയുക്ത , ആദിൽ ഹുസൈൻ തുടങ്ങിയ വൻ താരനിര അണിനിരക്കുന്ന ചിത്രം രണ്ടുഭാഗങ്ങളിലായിട്ടിയിരിക്കും തീയേറ്ററുകളിലെത്തുക . യുകെ , ഇസ്രായേൽ എന്നിവിടങ്ങളിലാണ് ചിത്രത്തിന്റെ അടുത്ത ഷെഡ്യൂൾ.

രാജീവ് രവി സംവിധാനം ചെയ്ത തുറമുഖമാണ് ഇന്ദ്രജിത്തിന്റെ റിലീസിന് തയാറെടുക്കുന്ന ചിത്രം . നിവിൻ പോളി നായകനാകുന്ന ചിത്രം മാർച്ച് 9 ന് തീയേറ്ററുകളിലെത്തും. ചിത്രീകരണം പൂർത്തിയാക്കിയ തമിഴ് ചിത്രമടക്കം നിരവധി സിനിമകളും ഇന്ദ്രജിത്തിന്റേതായി പുറത്തിറങ്ങാനുണ്ട്