ജയിലറിന് ശേഷം അടുത്ത ചിത്രം ഷാരൂഖാനൊപ്പമെന്ന് സ്ഥിരീകരിച്ച് ജാഫർ സാദിഖ്. തമിഴ് സിനിമകളിലെ വില്ലൻ വേഷങ്ങളിലൂടെ ശ്രദ്ധേയനായ ജാഫർ ഷാരൂഖ് ചിത്രം ജവാനിലൂടെ ബോളിവുഡിലേക്ക് അരങ്ങേറ്റം കുറിക്കാനൊരുങ്ങുകയാണ്. എന്നാൽ രൂപത്തെ പരിഹസിക്കുന്ന രീതിയിൽ സോഷ്യൽ മീഡിയയിൽ വരുന്ന കമന്റുകൾ വേദനിപ്പിക്കാറുണ്ടെന്നും ജാഫർ പറയുന്നു. തമിഴ് ഓൺലൈൻ മാധ്യമത്തിന് നൽകിയ അഭിമുഖത്തിലാണ് ജാഫർ ഇക്കാര്യം തുറന്ന് പറഞ്ഞത്
ജവാനിൽ ഒരു ചെറിയ വേഷം ചെയ്യുന്നുവെന്നും തികച്ചും വ്യത്യസ്തമായ വേഷമായിരിക്കുമെന്നും ജാഫർ സാദിഖ് പറയുന്നു. പാവ കഥൈകൾ എന്ന ചിത്രത്തിലൂടെ ശ്രദ്ധേയനായ ജാഫർ രജനികാന്തിന്റെ ജയിലറിലും വില്ലൻ വേഷത്തിലാണ് എത്തിയത് . സൂപ്പർസ്റ്റാർ ചിത്രത്തിന്റെ ഭാഗമാകാൻ സാധിച്ചതിൽ സന്തോഷമുണ്ടെന്നും ജാഫർ സാദിഖ് പറയുന്നു.
ബാക്ക്-ടു-ബാക്ക് ഹിറ്റുകളിലൂടെ ആരാധകരുടെ പ്രിയപ്പെട്ട നടനായി മാറിയിരിക്കുകയാണ് ജാഫർ സാദിഖ്. കമൽഹാസൻ ചിത്രം വിക്രത്തിലെ ഗ്യാങ്‌സ്റ്റർ വേഷവും ഏറെ പ്രശംസിക്കപ്പെട്ടിരുന്നു. ചിമ്പുവിന്റെ പത്തുതലയിലും നെഗറ്റീവ് റോളിലാണ് സാദിഖ് എത്തിയത്
സംവിധായകൻ അറ്റ്‌ലിയുടെ ബോളിവുഡ് അരങ്ങേറ്റ ചിത്രമാണ് ജവാൻ. ദക്ഷിണേന്ത്യയിൽ നിന്നുള്ള വൻ താരനിര തന്നെയാണ് ചിത്രത്തിന്റെ ഭാഗമാകുന്നത്. നയൻതാര, പ്രിയാമണി, വിജയ് സേതുപതി, യോഗി ബാബു എന്നിവർക്ക് പുറമെ അതിഥി വേഷത്തിൽ ദീപിക പദുക്കോണുമുണ്ട്. ചിത്രത്തിന് സംഗീതം ചിട്ടപ്പെടുത്തിക്കൊണ്ട് അനിരുദ്ധ് രവിചന്ദറും ബോളിവുഡിലേക്ക് അരങ്ങേറ്റം കുറിക്കുകയാണ്. ചിത്രം സെപ്റ്റംബർ 7ന് തീയേറ്ററുകളിലെത്തും.