രജനീകാന്ത് ചിത്രം ജയിലറിന്റെ വിജയാഘോഷത്തിൽ ആരാധകർ. ആവേശം അതിരുകടന്നതോടെ ചിത്രത്തിന്റെ പ്രദർശനം നിർത്തിവയ്ക്കേണ്ടി വന്നു . സ്ക്രീനിന് കേടുപാടുകൾ സംഭവിച്ചതിനെ തുടർന്നാണ് ചെന്നൈയിലെ ഒരു തീയേറ്ററിൽ പ്രദർശനം നിർത്തേണ്ടിവന്നത്. രജനികാന്ത് ചിത്രം ജയിലർ കണ്ട് ആവേശഭരിതരായ ആരാധകർ സ്ക്രീനിന് മുൻപിൽ നൃത്തം ചെയ്യുന്നതിനിടെയാണ് സ്ക്രീനിന് കേടുപാടുകൾ സംഭവിച്ചത്.
അതേസമയം, ചിത്രത്തിന്റെ സംവിധായകൻ നെൽസൺ ദിലീപ്കുമാറിന് തമിഴ്‌നാട് മുഖ്യമന്ത്രി എം കെ സ്റ്റാലിന്റെ അഭിനന്ദനം . ജയിലർ മികച്ച എന്റർടെയ്‌നർ ചിത്രമാണെന്ന് മുഖ്യമന്ത്രി പറഞ്ഞു . എല്ലാ അഭിനന്ദനങ്ങൾക്കും പ്രോത്സാഹനത്തിനും നന്ദി പറഞ്ഞ് നെൽസണും മറുപടി നൽകി. അഭിനേതാക്കളും അണിയറപ്രവർത്തകരും നിങ്ങളുടെ വാക്കുകളിൽ സന്തോഷിക്കുന്നെന്നും നെൽസൺ സോഷ്യൽ മീഡിയയിൽ കുറിച്ചു
വിജയ് യും സംവിധായകന് അഭിനന്ദനമറിയിച്ചിരുന്നു. ചിത്രത്തിലെ മികച്ച പ്രകടനത്തിന് താരങ്ങളായ മോഹൻലാലിനും ശിവ രാജ്‌കുമാറിനും പ്രശംസ ലഭിച്ചതിനെക്കുറിച്ച് നെൽസൺ അടുത്തിടെ ഒരു മാധ്യമത്തിന് നൽകിയ അഭിമുഖത്തിൽ പറഞ്ഞിരുന്നു. അതേസമയം ബോക്‌സ് ഓഫീസിൽ വമ്പൻ കളക്ഷനുമായി മുന്നേറുകയാണ് ജയിലർ. ചിത്രം രണ്ട് ദിവസം കൊണ്ട് ആഗോളതലത്തിൽ 135 കോടി രൂപ നേടിയതായാണ് റിപ്പോർട്ട്.
ഒന്നാം ദിവസം 72 കോടിയിലധികം നേടിയ ജയിലർ രണ്ടാം ദിനത്തിൽ നേരിയ ഇടിവ് രേഖപ്പെടുത്തിയിരുന്നു. എന്നാൽ ചിത്രത്തിന് പോസിറ്റീവ് റിവ്യൂ ലഭിച്ചതോടെ രജനികാന്തിന്റെ അവസാന രണ്ട് റിലീസുകളെ അപേക്ഷിച്ച് ജയിലർ ഏറ്റവും കൂടുതൽ കളക്ഷൻ നേടുമെന്നാണ് പ്രതീക്ഷിക്കുന്നത്.
നെൽസൺ ദിലീപ് കുമാർ സംവിധാനം ചെയ്ത ജയിലർ ഓഗസ്റ്റ് 10നാണ് തിയേറ്ററിൽ എത്തിയത്. രജനികാന്തിന് പുറമെ മോഹൻലാൽ, കന്നഡ നടൻ ശിവരാജ്കുമാർ, തമന്ന, രമ്യാ കൃഷ്ണൻ, ജാക്കി ഷ്റോഫ്, യോഗി ബാബു, വസന്ത് രവി, വിനായകൻ, തുടങ്ങിയവർ ചിത്രത്തിൽ പ്രധാന വേഷങ്ങളിലെത്തുന്നു. പാൻ-ഇന്ത്യൻ ചിത്രം ലോകമെമ്പാടുമുള്ള 7000 സ്‌ക്രീനുകളിലാണ് പ്രദർശനത്തിനെത്തിയത്. ആക്ഷൻ എന്റർടെയ്‌നർ ചിത്രത്തിലെ സംഗീതം ചിട്ടപ്പെടുത്തിയിരിക്കുന്നത് അനിരുദ്ധ് രവിചന്ദറാണ്.