ആരാധകരെ ആവേശത്തിലാക്കി ലോകേഷ് കനക രാജ് ചിത്രം ലിയോയിലെ ആദ്യ ഗാനത്തിന്റെ ലിറിക്കല് വീഡിയോ പുറത്ത്. വിജയിയുടെ പിറന്നാള് ദിനത്തില് സോണി മ്യൂസിക്ക് സൗത്തിലൂടെയാണ് അണിയറ പ്രവര്ത്തകര് ഗാനം പുറത്തുവിട്ടത്. വിജയ് ആലപിച്ച ഗാനം കുറച്ചു സമയത്തിനുള്ളില് യൂട്യൂബ് റെക്കോര്ഡുകള് തകര്ത്ത് മുന്നേറുകയാണ്. പുറത്ത് വിട്ട് 14 മിനിറ്റില് ഒരു മില്യണ് കാഴ്ചക്കാരെയാണ് ഗാനത്തിന് ലഭിച്ചത്. താരത്തിന്റെ പിറന്നാളിന് അതിമധുരം നല്കുന്നതായിരുന്നു ഗാനം.
അനിരുദ്ധ് രവി ചന്ദ്രനാണ് ഗാനം ഒരുക്കിയിരിക്കുന്നത്. നാ റെഡി എന്ന് ആരംഭിക്കുന്ന ഗാനത്തിന്റെ വരികളൊരുക്കിയിരിക്കുന്നത് വിഷ്ണു ഇടവനാണ്. പാട്ടിന്റെ പ്രമോ വീഡിയോ കഴിഞ്ഞ ദിവസം പുറത്തുവിട്ടിരുന്നു. വിജയിയുടെ പിറന്നാള് ദിനത്തില് ഗാനം പുറത്തുവിടുമെന്ന് ലിയോയുടെ സംവിധായകന് ലോകേഷ് കനകരാജ് നേരത്തെ പ്രഖ്യാപിച്ചിരുന്നു.
താരത്തിന്റെ പിറന്നാള് ദിനത്തിനോടനുബന്ധിച്ച് ഏറെ ആകാംക്ഷയോടെ കാത്തിരുന്ന ലിയോ ചിത്രത്തിന്റെ ഫസ്റ്റ് ലുക്ക് പോസ്റ്ററും പുറത്തുവിട്ടിരുന്നു. രക്തം തെറിപ്പിച്ച് ചുറ്റിക വീശുന്ന വിജയ് ആണ് പോസ്റ്ററിലുള്ളത്. നേരത്തെ സ്വർണനിറത്തിലായിരുന്ന ലിയോ ടെെറ്റിൽ പോലും ചുവന്ന നിറത്തിലാണ് ഫസ്റ്റ് ലുക്ക് പോസ്റ്ററിൽ കൊടുത്തിരിക്കുന്നത്. ബ്രഹ്മാണ്ഡ കൊമേർഷ്യൽ ചിത്രത്തിന്റെ ആദ്യ ഒഫിഷ്യൽ പോസ്റ്റർ കൂടിയാണിത്.