വിജയ് ആരാധകര് ഏറെ പ്രതീക്ഷയോടെ കാത്തിരിക്കുന്ന ലോകേഷ് കനകരാജ് ചിത്രം 'ലിയോ'യുടെ പുതിയ അപ്ഡേറ്റ് എത്തിയിരിക്കുന്നു. വിജയുടെ പിറന്നാള് ദിനമായ ജൂൺ 22ന് ലിയോയിലെ ആദ്യ ഗാനം പുറത്തുവിടുമെന്ന് സംവിധായകൻ തന്നെയാണ് അറിയിച്ചത്. കൈയില് തോക്കും ചുണ്ടില് സിഗരറ്റുമായി മാസ് ലുക്കിലാണ് സോങ്ങ് പോസ്റ്ററില് വിജയ്.
അപ്ഡേറ്റ് പ്രഖ്യാപിക്കുന്ന ഫേസ്ബുക്ക് പോസ്റ്റിന് മുമ്പായി ലോകേഷ് 'റെഡിയാ?' എന്ന് ട്വീറ്റ് ചെയ്തതും വൈറലായിരുന്നു. കൃത്യം ഒരു മണിക്കൂറിന് ശേഷം റെഡിയാണെന്ന മറുപടിയുമായി വിജയും എത്തി.
ആയിരത്തിലധികം നര്ത്തകര്ക്കൊപ്പം വിജയ് എത്തുന്ന ഒരു ഗാനരംഗം അടുത്തിടിെ ചിത്രീകരിച്ചിരുന്നു. വിജയ് തന്നെയാകാം ഗാനം ആലപിച്ചതെന്നും ആരാധകര് കണക്കുകൂട്ടുന്നു.
വിക്രം, കൈതി എന്നീ തന്റെ ഇരുചിത്രങ്ങളും ബന്ധപ്പെടുത്തി ലോകേഷ് ഒരു സീരിസ് സൃഷ്ടിക്കാനൊരുങ്ങുകയാണ്. ലിയോയും ഇതിന്റെ ഭാഗമാകുമെന്നാണ് റിപ്പോര്ട്ടുകൾ. അതുകൊണ്ടുതന്നെ ആദ്യ പാട്ട് ഏറെ പ്രതീക്ഷയോടെയാണ് ആരാധകര് കാത്തിരിക്കുന്നത്.
സെവന് സ്ക്രീന് സ്റ്റുഡിയോ, ദി റൂട്ട് എന്നിവയുടെ ബാനറുകളില് ലളിത് കുമാറും ജഗദീഷ് പളനിസാമിയും ചേര്ന്നാണ് 'ലിയോ' നിര്മ്മിക്കുന്നത്. തൃഷ, സഞ്ജയ് ദത്ത്, അര്ജുന് സര്ജ, ഗൗതം മേനോന്, മിഷ്കിന്, മാത്യു തോമസ്, മന്സൂര് അലി ഖാന്, പ്രിയ ആനന്ദ്, സാന്ഡി, ജനനി, അഭിരാമി വെങ്കിടാചലം, ബാബു ആന്റണി തുടങ്ങി നിരവധി താരങ്ങളാണ് ചിത്രത്തില് അണിനിരക്കുന്നത്. ഒക്ടോബര് 19 ന് ലോകമെമ്പാടും ലിയോ തിയേറ്ററുകളില് എത്തും.