റോഷാക്കിന് ശേഷം മമ്മൂട്ടി കമ്പനി നിർമിക്കുന്ന സിനിമയുടെ ഫസ്റ്റ്ലുക്ക് പുറത്ത്. മമ്മൂട്ടിയും ജ്യോതികയും ഒന്നിക്കുന്ന 'കാതലി'ന്റെ ഫസ്റ്റ്ലുക്ക് ഫേസ്ബുക്ക് പേജിലൂടെ മമ്മൂട്ടി തന്നെയാണ് പങ്കുവെച്ചത് . ജ്യോതികയുടെ ജന്മദിനത്തിലാണ് ആശംസകള്‍ നേര്‍ന്ന് മമ്മൂട്ടി പോസ്റ്റര്‍ പുറത്തുവിട്ടത്.
ദുൽഖർ സൽമാന്റെ വേഫേറെർ ഫിലിംസ് ആണ് ചിത്രത്തിന്റെ വിതരണം നിർവഹിക്കുന്നത്. ജിയോ ബേബിയാണ് ചിത്രം സംവിധാനം ചെയ്യുന്നത്. പന്ത്രണ്ട് വര്‍ഷത്തിന് ശേഷം ജ്യോതിക മലയാളത്തിലേക്ക് തിരിച്ചെത്തുന്നു എന്ന പ്രത്യേകതയും കാതലിനുണ്ട്. ലാലു അലക്സ്, മുത്തുമണി, ചിന്നു ചാന്ദിനി, സുധി കോഴിക്കോട്, അനഘ അക്കു, ജോസി സിജോ, ആദർശ് സുകുമാരൻ തുടങ്ങിയവരാണ് ചിത്രത്തിലെ മറ്റ് താരങ്ങള്‍. ആദർഷ് സുകുമാരനും പോൾസൺ സ്‌കറിയയും ചേർന്നാണ് തിരക്കഥയൊരുക്കിയിരിക്കുന്നത്.
കാതലിന്റെ ചിത്രീകരണം ഒക്ടോബർ 20ന് കൊച്ചിയിൽ ആരംഭിക്കും.