മലയാളത്തിന്റെ പ്രിയ താരം നിവിന്പോളിയുടെ ഏറ്റവും പുതിയ ലുക്ക് ആണ് ഇപ്പോൾ സാമൂഹ്യ മാധ്യമങ്ങളിലാകെ വൈറൽ ആകുന്നത്. തന്റെ പുതിയ സിനിമക്കായുള്ള നിവിൻ പോളിയുടെ മെയ്ക്ക് ഓവർ ചിത്രങ്ങൾ കഴിഞ്ഞ ദിവസമാണ് പുറത്തുവന്നത്. ദുബായ് എയർപോർട്ടിൽ നിന്നുള്ള ചിത്രങ്ങൾ ആരാധകർ ഏറ്റെടുത്ത് കഴിഞ്ഞു. ' താരം ' ആണ് നിവിൻ പോളിയുടെ വരാനിരിക്കുന്ന ചിത്രം. സിനിമയുടെ ആദ്യ ഷെഡ്യൂളിന് ശേഷം നിവിൻ നീണ്ട അവധി എടുത്തിരുന്നു. കഴിഞ്ഞ ഏതാനും മാസമായി താരം അതികഠിനമായ വർക്ക് ഔട്ടിലും ഡയറ്റിലും ആയിരുന്നു. അജു വര്ഗീസും അനൂപ് മേനോനുമടക്കമുള്ള താരങ്ങൾ അഭിനന്ദനം അറിയിച്ച് നിവിന്റെ ഫോട്ടോ സോഷ്യൽ മീഡിയയിൽ പങ്കുവച്ചിട്ടുണ്ട്
മുൻപേയുള്ള ചിത്രങ്ങളിൽ നിവിന്റെ ലുക്ക് വലിയ വിമർശനങ്ങൾക്ക് ഇടയാക്കിയിരുന്നു. സോഷ്യൽ മീഡിയകളിൽ നിവിൻ ക്രൂരമായ ബോഡി ഷെയ്‌മിങ്ങാണ് നേരിട്ടത്. രാജീവ് രവിയുടെ തുറമുഖം, ലിജു കൃഷ്‍ണയുടെ പടവെട്ട്, രതീഷ് ബാലകൃഷ്‍ണന്‍ പൊതുവാളിന്‍റെ കനകം കാമിനി കലഹം, എബ്രിഡ് ഷൈനിന്‍റെ മഹാവീര്യര്‍ എന്നിവയായിരുന്നു നിവിന്റേതായി കഴിഞ്ഞ വര്ഷം പുറത്തിറങ്ങിയ ചിത്രം.എന്നാൽ മൂന്ന് ചിത്രങ്ങൾക്കും തിയേറ്ററുകളിൽ കാര്യമായ ചലനം ഉണ്ടാക്കാൻ സാധിച്ചില്ല. മലയാളത്തിലെ ആദ്യ ടൈം ട്രാവൽ കോർട്ട് ഡ്രാമയായി പുറത്തിറങ്ങിയ സിനിമയെന്ന നിലയിൽ മഹാവീര്യർ നിരൂപകപ്രശംസ നേടിയിരുന്നു.
വിനയ് ഗോവിന്ദ് സംവിധാനം ചെയ്യുന്ന ചിത്രമാണ് താരം. കിളി പോയി, കോഹിനൂര്‍ എന്നീ ചിത്രങ്ങളുടെ സംവിധായകനാണ് വിനയ്. ചിത്രം റൊമാന്റിക് കോമഡി എന്റർടെയ്നറാണെന്നാണ് സൂചന . ഹിമാചല്‍ പ്രദേശിലെ മണാലിയില്‍ വച്ചായിരുന്നു ചിത്രത്തിന്റെ പൂജ നടന്നത്.വിവേക് രഞ്ജിത്താണ് തിരക്കഥയൊരുക്കുന്നത്. കിളിപോയി എന്ന സിനിമയുടെ സഹതിരക്കഥാകൃത്തായിരുന്നു വിവേക്. വിനയ് ഫോര്‍ട്ട്, നിഖില വിമല്‍, കയാദു ലോഹര്‍, കൃഷ്ണ ശങ്കര്‍, നമിത കൃഷ്ണമൂര്‍ത്തി തുടങ്ങിയവാണ് താരത്തില്‍ മറ്റ് കഥാപാത്രങ്ങളെ അവതരിപ്പിക്കുന്നത്. മാജിക് ഫ്രെയിംസിന്റെ ബാനറില്‍ ലിസ്റ്റിന്‍ സ്റ്റീഫനും പോളി ജൂനിയര്‍ പിക്‌ചേഴ്‌സും ചേര്‍ന്നാണ് ചിത്രം നിര്‍മ്മിക്കുന്നത്. സിനിമ മേഖലയുമായി ബന്ധപ്പെട്ടതായിരിക്കും കഥയെന്നും എന്നാല്‍ സിനിമയ്ക്കുള്ളിലെ സിനിമ ആയിരിക്കില്ലെന്ന് സംവിധായകൻ വിനയ് മുൻപ് പ്രതികരിച്ചിരുന്നു.ഇപ്പോള്‍ നമ്മള്‍ കാണുന്ന തരത്തിലുള്ള റിയലിസ്റ്റിക് ചിത്രവുമല്ല എന്നും അദ്ദേഹം പറഞ്ഞിരുന്നു. ആക്ഷൻ ഹീറോ ബിജു 2 ആണ് ഈ വർഷം വരാനിരിക്കുന്ന നിവിൻപോളിയുടെ മറ്റൊരു ചിത്രം .