പ്രഭാസ് നായകനാക്കുന്ന പാൻ ഇന്ത്യൻ ചിത്രം സലാറിന്റെ റിലീസ് തീയതി പുറത്തുവിട്ട് കെ ജി എഫ് നിർമ്മാതാക്കൾ. പ്രഭാസിനെ നായകനാക്കി പ്രശാന്ത് നീൽ സംവിധാനം ചെയ്ത പാൻ ഇന്ത്യന്‍ ചിത്രമായ സലാർ 2023 സെപ്തംബറില്‍ പ്രേക്ഷകർക്ക് മുന്നിലെത്തുംസ്വാതന്ത്ര്യ ദിനത്തോടനുബന്ധിച്ച്, സലാറിന്റെ റിലീസ് തീയതി അറിയിച്ചുകൊണ്ടുള്ള പോസ്റ്റർ പുറത്തിറക്കിയിരിക്കുകയാണ് അണിയറപ്രവർത്തകർ. പ്രഭാസിനൊപ്പം പൃഥ്വിരാജ് സുകുമാരനും ചിത്രത്തില്‍ പ്രധാന കഥാപാത്രത്തെ അവതരിപ്പിക്കുന്നുണ്ട്.
ഇന്ത്യ, യൂറോപ്പ്, മിഡിൽ ഈസ്റ്റ്, ആഫ്രിക്ക തുടങ്ങിയവിടങ്ങളിലായി ചിത്രീകരിച്ച മാസ് ആക്ഷൻ അഡ്വഞ്ചർ ചിത്രമാണ് സലാർ. ആദ്യ ഷെഡ്യൂൾ പൂർത്തിയാക്കിയ ചിത്രത്തിന്റെ രണ്ടാം ഷെഡ്യൂൾ ഉടന്‍ തുടങ്ങുന്നതിനു വേണ്ടിയുള്ള തയ്യാറെടുപ്പിലാണ് പ്രഭാസ്. ശ്രുതി ഹാസൻ നായികയാകുന്ന ഈ ചിത്രം ഇന്ത്യയിൽ അഞ്ച് ഭാഷകളിലായി റിലീസ് ചെയ്യും. അടുത്ത വർഷം സെപ്റ്റംബർ 28ന് സലാര്‍ തീയേറ്ററുകളില്‍ എത്തിക്കുമെന്നാണ് ഹോംബാലെ ഫിലിംസ് അറിയിച്ചിരിക്കുന്നത്.
ഇന്ത്യയിലെ ഏറ്റവും വലിയ രണ്ട് ഫ്രാഞ്ചൈസികളായ ബാഹുബലിയുടെയും കെജിഎഫിന്റെയും ഒത്തുചേരലാണ് സലാർ. ഹോംബാലെ ഫിലിംസ്, കെജിഎഫിന്റെ നിർമ്മാതാക്കൾ, കെജിഎഫിന്റെ സംവിധായകൻ, കെജിഎഫിന്റെ സാങ്കേതിക വിദഗ്ധർ, ബാഹുബലിയിലെ നായകൻ എന്നിവർ ആദ്യമായി ഒന്നിക്കുന്നതിലോടെ 2023 ൽ മറ്റൊരു ബ്ലോക്ക് ബസ്റ്ററിനായി കാത്തിരിക്കുകയാണ് സാലറിലൂടെ ആരാധകർ. 400 കോടിക്ക് മുകളിലാണ് ഹോംബാലെ ഫിലിംസ് നിർമ്മിക്കുന്ന സലാറിന്റെ ബഡ്ജറ്റ്.