ബോളിവുഡ് സൂപ്പര്‍താരം പ്രിയങ്ക ചോപ്രയും ഭര്‍ത്താവായ പോപ് സൂപ്പര്‍സ്റ്റാര്‍ നിക് ജോനാസും മകള്‍ മാള്‍ട്ടി മേരിക്കൊപ്പം മുബൈയിലെത്തി. മാള്‍ട്ടിയുടെ ആദ്യ ഇന്ത്യ സന്ദർശനമാണിത്. ഇന്ന് ഉച്ചയ്ക്കാണ് താരം മകള്‍ക്കും ഭര്‍ത്താവിനുമൊപ്പം മുംബൈ എയര്‍പോര്‍ട്ടില്‍ എത്തിയത്. എയര്‍പോര്‍ട്ടില്‍ വച്ച് മകള്‍ക്കൊപ്പം ഇരുവരും ക്യാമറയ്ക്ക് പോസ് ചെയ്യുകയും ചെയ്തു. മാൾട്ടി മേരി ചോപ്ര ജൊനാസ് എന്നാണ് കുഞ്ഞിന്റെ മുഴുവൻ പേര്.
2022 ജനുവരിയാലാണ് പ്രിയങ്കയും നിക് ജോനാസും സറോഗസിയിലൂടെ 'പെണ്‍കുഞ്ഞിൻ്റെ' മാതാപിതാക്കളായത്. ജോനാസ് സഹോദരങ്ങളുടെ 'വോക്ക് ഓഫ് ഫെയിം' ചടങ്ങിലാണ് പ്രിയങ്ക ആദ്യമായി മകളെ പരിചയപ്പെടുത്തിയത്. അതുവരെ മകളുടെ ഇമോജികൾ കൊണ്ട് മറച്ച ചിത്രങ്ങൾ മാത്രമാണ് നിക്കും പ്രിയങ്കയും പങ്കുവച്ചിരുന്നത്. ഈ വര്‍ഷം തുടക്കത്തില്‍ തന്നെ ബ്രിട്ടീഷ് വോഗിന്റെ കവറില്‍ മകള്‍ക്കൊപ്പമെത്തിയ പ്രിയങ്കയുടെ ചിത്രങ്ങള്‍ ഏറെ ശ്രദ്ധേയമായിരുന്നു.
2017 ല്‍ നടന്ന മെറ്റ് ഗാല ഫാഷന്‍ ഇവന്റില്‍ വച്ചായിരുന്നു പ്രിയങ്കയും നിക്കും കണ്ടുമുട്ടിയത്. 2018 ഡിസംബര്‍ ഒന്നിനായിരുന്നു ഇരുവരുടെയും വിവാഹം. ജോധ്പൂരിലെ ഉമൈദ് ഭവന്‍ പാലസില്‍ ക്രിസ്ത്യന്‍, ഹിന്ദു ആചാരപ്രകാരമാണ് വിവാഹിതരായത്. പ്രിയങ്ക ചോപ്രയുടെ വരാനിരിക്കുന്ന ലവ് എഗെയ്ന്‍ എന്ന ചിത്രത്തില്‍ നിക്ക് ജോനാസ് അതിഥി വേഷത്തില്‍ എത്തുന്നുണ്ട്.