സ്വാസിക നായികയായ 'ചതുരം' കുറച്ച് നാളുകളായി മാധ്യമങ്ങളിൽ നിറഞ്ഞു നിൽക്കുകയാണ്. ഇപ്പോൾ തരംഗമായി മാറിയിരിക്കുന്നത് ചിത്രത്തിലെ ഗാനമാണ്. 'റാണി' എന്ന ഗാനം യൂട്യൂബിൽ ഒറ്റ ദിവസം കൊണ്ട് രണ്ടര ലക്ഷത്തിലധികം പേരാണ് കണ്ടത്. വീഡിയോ ട്രെൻ്റിങ്ങിൽ രണ്ടാമതും എത്തിക്കഴിഞ്ഞു. സിദ്ധാർഥ് ഭരതൻ സംവിധാനം നിർവഹിച്ച ചിത്രത്തിൽ വളരെ വ്യത്യസ്തമായ ഒരു വേഷമാണ് സ്വാസിക കൈകാര്യം ചെയ്തിരിക്കുന്നത്. ടൈപ്പ് കാസ്റ്റ് ആയി പോയിക്കൊണ്ടിരുന്ന കരിയറിൽ ഒരു മാറ്റം ആഗ്രഹിച്ചാണ് ചതുരം ചെയ്തതെന്ന് സ്വാസിക 'ദ ഫോർത്തി'ന്റെ ഇൻസ്റ്റഗ്രാം ലൈവിൽ പറഞ്ഞിരുന്നു.
നവംബർ നാലിന് തീയേറ്ററിൽ റിലീസായ ചിത്രത്തിന് വൻ സ്വീകാര്യത ലഭിച്ചിരുന്നു. ഒടിടി റിലീസ് ഉടനെ ഉണ്ടാകുമെന്നാണ് പ്രതീക്ഷ. പ്രണയം, കാമം, പ്രതികാരം ഒക്കെ പ്രമേയമായി വരുന്ന ചിത്രത്തിൽ 'സെലേന' എന്ന കഥാപാത്രത്തെയാണ് സ്വാസിക അവതരിപ്പിച്ചത്.
പ്രശാന്ത് പിള്ളയുടെ സംഗീതത്തിൽ സിതാര കൃഷ്ണകുമാറാണ് ഗാനം ആലപിച്ചിരിക്കുന്നത്. ആമേൻ, അനുരാഗ കരിക്കിൻവെള്ളം, അങ്കമാലി ഡയറീസ്, ജല്ലിക്കെട്ട് തുടങ്ങി നിരവധി ചിത്രങ്ങൾക്ക് പ്രശാന്ത് പിള്ള സംഗീത സംവിധാനം നിർവഹിച്ചിട്ടുണ്ട് .
റോഷൻ മാത്യു, അലൻസിയർ, ശാന്തി ബാലചന്ദ്രൻ, ലിയോണ ലിഷോയ്, ജാഫർ ഇടുക്കി, നിശാന്ത് സാഗർ, ജിലു ജോസഫ് എന്നിവരാണ് ചിത്രത്തിലെ മറ്റ് കഥാപാത്രങ്ങളെ അവതരിപ്പിച്ചിരിക്കുന്നത്. ചിത്രത്തിന്റെ ഛായാഗ്രഹണം പ്രദീഷ് വർമ്മയും എഡിറ്റിംഗ് ദീപു ജോസഫും ആണ് നിർവ്വഹിച്ചിരിക്കുന്നത്.