പ്രേക്ഷകർ അധികം കാത്തിരിക്കേണ്ട, രജനീകാന്ത് ചിത്രം ജയിലർ നേരത്തെ എത്തുമെന്ന് റിപ്പോർട്ട്. ദീപാവലി റിലീസായി ചിത്രം നവംബറിൽ തീയേറ്ററുകളിലെത്തുമെന്നായിരുന്നു നേരത്തേയുള്ള പ്രഖ്യാപനം. എന്നാൽ കമൽഹാസന്റെ ഇന്ത്യൻ 2, വിജയ് ചിത്രം ലിയോ, പേരിടാത്ത അജിത്ത്, സൂര്യ ചിത്രങ്ങൾ എന്നിവ ഉൾപ്പെടെ മുൻനിര താരങ്ങളുടെയെല്ലാം സിനിമകൾ ദീപാവലി റിലീസ് പ്രഖ്യാപിച്ചിട്ടുണ്ട് . ഇവയെ കൂടാതെ അന്യഭാഷ ചിത്രങ്ങളുമുണ്ടാകും. അതിനാൽ തന്നെ ഫാൻ ഫൈറ്റ് ഒഴിവാക്കുന്നതിന്റെ ഭാഗമായാണ് ജയിലർ നേരത്തെ എത്തുന്നതെന്നാണ് തമിഴകത്തുനിന്നുള്ള റിപ്പോർട്ട്.

ബീസ്റ്റിന്റെ പരാജയത്തിന് ശേഷം നെൽസൺ ദിലീപ് കുമാർ ഒരുക്കുന്ന ചിത്രം ബോക്സ് ഓഫീസ് വിജയം മാത്രം ലക്ഷ്യം വച്ചുള്ളതാണ്. ഫാൻ ഫൈറ്റിൽപ്പെട്ട് ചിത്രം പ്രേക്ഷകരിലേക്ക് എത്താതെ പോകുമെന്നുള്ള ആശങ്കയും അണിയറ പ്രവർത്തകർക്കുണ്ട്. വിജയ് ചിത്രം ലിയോ, കമൽ ചിത്രം ഇന്ത്യൻ 2, സൂര്യ ചിത്രം എന്നിവ ഇപ്പോൾ തന്നെ പ്രീ ബിസിനസിൽ ഉൾപ്പെടെ മുന്നിലാണെന്നതും ജയിലർ നേരത്തെ എത്താനുള്ള കാരണമായി വിലയിരുത്തപ്പെടുന്നു.

മോഹൻലാലും രജനീകാന്തും ആദ്യമായി ഒരുമിക്കുന്നു എന്നതാണ് ജയിലറിന്റെ പ്രത്യേകത. പടയപ്പയ്ക്ക് ശേഷം രജനീകാന്തും രമ്യാ കൃഷ്ണനും ഒരുമിക്കുന്ന ചിത്രം കൂടിയാണിത്. ചിത്രത്തിന്റെ ഷൂട്ടിങ് അവസാനഘട്ടത്തിലാണ്. ഏപ്രിൽ പതിനഞ്ചോടെ ചിത്രീകരണം പൂർത്തിയാകും.

സൺ പിക്ചേഴ്സ് നിർമ്മിക്കുന്ന ചിത്രം ആക്ഷൻ ത്രില്ലറാണെന്നാണ് സൂചന. പ്രിയങ്ക മോഹൻ, ശിവരാജ് കുമാർ, ജാക്കി ഷ്രോഫ്, രാമകൃഷ്ണൻ, യോഗി ബാബു, വസന്ത് രവി എന്നിവർ പ്രധാന വേഷങ്ങളിലെത്തുന്ന ചിത്രത്തില്‍ ജയിലർ മുത്തുവേൽ പാണ്ഡ്യനായാണ് രജനീകാന്ത് എത്തുന്നത്.