തൊണ്ടിമുതലും ദൃക്സാക്ഷിയും , സത്യം പറഞ്ഞാ വിശ്വസിക്കുവോ , കേശു ഈ വീടിന്റെ നാഥൻ എന്നീ ചിത്രങ്ങൾക്ക് ശേഷം സജീവ് പാഴൂർ തിരക്കഥ എഴുതുന്ന ചിത്രമാണ് പഞ്ചവത്സര പദ്ധതി. ആത്മകഥ എന്ന ചിത്രമൊരുക്കിയ പി ജി പ്രേംലാലാണ് സംവിധാനം. സിജു വിൽസൺ നായകനാകുന്ന ചിത്രത്തിൽ പുതുമുഖം കൃഷ്ണേന്ദുവാണ് നായിക .

ഒരു ഗ്രാമമാണ് സിനിമയുടെ പശ്ചാത്തലം . വയനാടാണ് ലൊക്കേഷൻ . എന്നാൽ ചിത്രത്തിന്റെ കഥയെ പറ്റി ഇപ്പോൾ പറയാനാകില്ലെന്ന് തിരക്കഥാകൃത്ത് സജീവ് പാഴൂർ ദ ഫോർത്തിനോട് പറഞ്ഞു. പേര് സൂചിപ്പിക്കുന്ന പോലെ തന്നെ ആക്ഷേപഹാസ്യ വിഭാഗത്തിൽപ്പെടുന്ന ചിത്രമാണ് പഞ്ചവത്സര പദ്ധതി. പ്രേംലാലുമായുള്ള സൗഹൃദമാണ് പഞ്ചവത്സര പദ്ധതിയിലേക്കെത്തിച്ചതെന്നും സജീവ് പാഴൂർ വ്യക്തമാക്കി. ഒരു മാസം കൂടി വയനാട്ടിൽ ചിത്രീകരണമുണ്ടാകും .

ചിത്രത്തിന്റെ ഫസ്റ്റ് ലുക്ക് പോസ്റ്റർ ഇന്നലെ പുറത്തിറങ്ങിയിരുന്നു

ഐസിഎൽ ഫിൻകോർപ്പിന്റെ ബാനറിൽ കെ ജി അനിൽ കുമാറാണ് നിർമാണം. കുഞ്ഞികൃഷ്ണൻ, സുധീഷ് , ജോളി ചിറയത്ത്, നിഷ സാരംഗ് തുടങ്ങിയവരാണ് മറ്റ് താരങ്ങൾ. റഫീഖ് അഹമ്മദിന്റെ വരികൾക്ക് ഷാൻ റഹ്മാൻ സംഗീതം ഒരുക്കുന്ന മൂന്ന് ഗാനങ്ങളാണ് ചിത്രത്തിലുള്ളത്. 20 ദിവസത്തിലേറെയായി വയനാട്ടിൽ ചിത്രീകരണം പുരോഗമിക്കുന്ന പഞ്ചവത്സര പദ്ധതിയുടെ റിലീസ് തിയതി തീരുമാനിച്ചിട്ടില്ല