ബോക്സ് ഓഫീസിൽ ചരിത്ര നേട്ടവുമായി അറ്റ്ലി ചിത്രം ജവാനും ബോളിവുഡിന്റെ കിങ് ഖാൻ ഷാരൂഖും. ചിത്രം 1000 കോടി ക്ലബിൽ ഇടം നേടി. തുടർച്ചയായി രണ്ടു ചിത്രങ്ങൾ ആയിരം കോടി ക്ലബിലെത്തിക്കുന്ന ബോളിവുഡ് താരമെന്ന റെക്കോർഡും ഇനി ഷാരൂഖിന് സ്വന്തം. 1004 കോടി രൂപയാണ് ചിത്രം ഇതുവരെ നേടിയതെന്ന് നിർമാതാക്കളായ റെഡ് ചില്ലീസ് എന്റർടെയ്ൻമെന്റ് പറയുന്നു. രാജമൗലിയാണ് രണ്ട് ചിത്രങ്ങൾ 1000 കോടി ക്ലബിലെത്തിച്ച സംവിധായകൻ

33 ദിവസം കൊണ്ടാണ് ജവാൻ 1000 കോടി ക്ലബിലെത്തിയത്. ഇതോടെ ബോളിവുഡിലെ അരങ്ങേറ്റ ചിത്രം തന്നെ 1000 കോടി ക്ലബിലെത്തിച്ച ആദ്യ തമിഴ് സംവിധായകനെന്ന അപൂർവ നേട്ടം ഇനി അറ്റ്ലിക്ക് സ്വന്തം.

തെലുങ്ക്, തമിഴ് , മലയാളം പതിപ്പുകൾ പ്രേക്ഷകർ കൈവിട്ടെങ്കിലും ഹിന്ദി പതിപ്പ് ആരാധകർ ഏറ്റെടുത്തതാണ് ജവാനെ 1000 കോടി ക്ലബിലെത്തിച്ചത്. നയൻതാര നായികയായ ചിത്രത്തിൽ വിജയ് സേതുപതിയാണ് വില്ലൻ വേഷത്തിൽ. സെപ്റ്റംബർ 7നാണ് ജവാന്‍ തീയേറ്ററുകളില്‍ എത്തിയത്.

കളക്ഷനിൽ പഠാന്റെ റെക്കോര്‍ഡ് ജവാൻ മറികടക്കുമോയെന്നാണ് ഇനിയുള്ള ചോദ്യം. ഷാരൂഖിന്റെ കരിയറിലെ ആദ്യ 1000 കോടിയായ പഠാൻ 1050 കോടിയാണ് ആകെ നേടിയത്. ജവാനും പഠാനും പുറമെ ആർ ആർ ആർ, ബാഹുബലി 2, കെജിഎഫ് രണ്ടാംഭാഗം എന്നിവാണ് ആയിരം കോടിയിലെത്തിയ ഇന്ത്യൻ ചിത്രങ്ങൾ