കാത്തിരിപ്പിനൊടുവിൽ ഷാരൂഖ് ഖാനും രാജ്കുമാർ ഹിരാനിയും ആദ്യമായി ഒന്നിക്കുന്ന 'ഡങ്കി'യുടെ ടീസർ പുറത്തിറക്കി. ഷാരൂഖ് ഖാന്റെ അമ്പത്തിയെട്ടാം ജന്മദിനത്തിനോട് അനുബന്ധിച്ചാണ് ടീസർ പുറത്തിറക്കിയത്. വിദേശരാജ്യങ്ങളിലേക്ക് അനധികൃതമായി കുടിയേറി പാർക്കാൻ ശ്രമിക്കുന്ന ഇന്ത്യാക്കാരുടെ കഥയാണ് ചിത്രം പറയുന്നത്. ഡോങ്കി ഫ്‌ളൈറ്റ് എന്ന പേരിൽ അറിയപ്പെടുന്ന ഈ അനധികൃത കുടിയേറ്റം യുകെ, യുഎസ്, കാനഡ പോലുള്ള രാജ്യങ്ങളിലേക്കാണ് പ്രധാനമായും നടക്കാറുള്ളത്.
തപ്‌സി പന്നുവാണ് ചിത്രത്തിൽ നായികയാവുന്നത്. ദിയാ മിർസ, ബൊമൻ ഇറാനി എന്നിവരാണ് ചിത്രത്തിലെ മറ്റുപ്രധാനകഥാപാത്രങ്ങളെ അവതരിപ്പിക്കുന്നത്. ഒരിടവേളക്ക് ശേഷം സിനിമയിലേക്ക് തിരികെയെത്തിയ ഷാരുഖ് 2023 ൽ ചെയ്ത രണ്ട് ചിത്രങ്ങളും റെക്കോർഡ് കളക്ഷനാണ് സ്വന്തമാക്കിയത്. സ്‌പൈ യൂണിവേഴ്‌സിൽ പെട്ട പത്താനും, ആറ്റ്‌ലി സംവിധാനം ചെയ്ത ജവാനുമായിരുന്നു ഷാരൂഖിന്റെതായി റിലീസ് ചെയ്ത ചിത്രങ്ങൾ.
ആരാധകരുടെ ഏറെ നാളത്തെ കാത്തിരിപ്പിനൊടുവിലാണ് ബോളിവുഡിലെ ഹിറ്റ് സംവിധായകൻ രാജ് കുമാർ ഹിരാനിയും ഷാരുഖ് ഖാനും ഒന്നിക്കുന്നത്. അതുകൊണ്ടുതന്നെ ഡങ്കിയും വലിയ ഹിറ്റാവുമെന്ന പ്രതീക്ഷയിലാണ് ആരാധകർ.
റെഡ് ചില്ലീസ് എന്റർടെയ്ൻമെന്റിന്റെ ബാനറിൽ രാജ്കുമാർ ഹിരാനി ഫിലിംസും, ജിയോ സ്റ്റുഡിയോയും ചേർന്നാണ് ഡങ്കി നിർമ്മിക്കുന്നത്. രാജ്കുമാർ ഹിരാനി, അഭിജത് ജോഷി, കനിക ധില്ലൻ എന്നിവരാണ് ചിത്രത്തിന്റെ കഥ രചിച്ചത്. സി കെ മുരളീധരനാണ് ചിത്രത്തിന്റെ ഛായാഗ്രഹണം. പ്രീതമാണ് ചിത്രത്തിന് സംഗീതം ഒരുക്കിയിരിക്കുന്നത്.