മൂന്ന് വർഷത്തിനുള്ളിൽ തന്റെ ഹോളിവുഡ് ചിത്രം ഉണ്ടാവുമെന്ന് സംവിധായകൻ ആറ്റ്ലി. എബിപി ന്യൂസ് കോൺക്ലേവിൽ സംസാരിക്കുന്നതിനിടെയാണ് അദ്ദേഹം ഇക്കാര്യം വെളിപ്പെടുത്തിയത്. ബോളിവുഡിൽ എത്തുന്നതിന് തനിക്ക് എട്ട് വർഷമെടുത്തു. മൂന്ന് വർഷത്തിനുള്ളിൽ ഒരു ഹോളിവുഡ് ചിത്രം വാഗ്ദാനം ചെയ്യുകയാണെന്നും അദ്ദേഹം പറഞ്ഞു.
ഷാരൂഖ് ഖാൻ ചിത്രം ജവാനിലൂടെ തന്റെ പ്രവർത്തി ആളുകൾ തിരിച്ചറിഞ്ഞതിൽ സന്തോഷമുണ്ടെന്നും അദ്ദേഹം പറഞ്ഞു. തന്റെ സിനിമയിൽ വരുന്ന അക്രമ സീനുകൾ ആരെയും പ്രകോപിപ്പിക്കാനില്ലെന്നും സഹജീവികളോടുള്ള ചില പ്രവർത്തനങ്ങൾ മനുഷ്യത്വപരമാണോ മനുഷ്യത്വരഹിതമാണോ എന്ന് പ്രേക്ഷകരെ പുനർവിചിന്തനം ചെയ്യാൻ പ്രേരിപ്പിക്കുന്നതാണെന്നും അദ്ദേഹം പറഞ്ഞു.
ഒരു സിനിമയിൽ നായ്ക്കളെ വെടിവയ്ക്കുന്ന ഒരു രംഗം ചിത്രീകരിച്ചാൽ പോലും, അത് അക്രമത്തെ സൂചിപ്പിക്കണമെന്നില്ല, മറിച്ച് അത് മൃഗങ്ങൾക്കെതിരായ അതിക്രമത്തെ ചോദ്യം ചെയ്യുന്നതായിരിക്കും. ഈ ശ്രമങ്ങളെല്ലാം അക്രമമായി കണക്കാക്കുന്നത് ദൗർഭാഗ്യകരമാണെന്നും ആറ്റ്ലി പറഞ്ഞു.
കഴിഞ്ഞ വർഷം ഏറ്റവും കളക്ഷൻ നേടിയ ബോളിവുഡ് ചിത്രങ്ങളിൽ ഒന്നാണ് ജവാൻ. ആഗോള ബോക്സ് ഓഫീസിൽ ആയിരം കോടി രൂപയാണ് ചിത്രം കളക്ട് ചെയ്തത്.
300 കോടി ബജറ്റിൽ ഒരുങ്ങിയ ചിത്രം ലോകമെമ്പാടും തമിഴ്, തെലുങ്ക്, ഹിന്ദി ഭാഷകളിൽ 4500 ഓളം തീയേറ്ററുകളിലാണ് റിലീസ് ചെയ്തത്.
സംവിധായകൻ അറ്റ്‌ലിയുടെ ആദ്യ ഹിന്ദി ചിത്രം എന്ന പ്രത്യേകതയും ജവാനുണ്ടായിരുന്നു. ഷാരൂഖിന്റെ ഉടമസ്ഥതയിലുള്ള റെഡ് ചില്ലീസ് എന്റർടെയ്ൻമെന്റിന്റെ ബാനറിൽ ഭാര്യ ഗൗരി ഖാനാണ് ജവാൻ നിർമിച്ചത്. പ്രിയാമണി, സന്യ മൽഹോത്ര എന്നിവരാണ് ചിത്രത്തിലെ മറ്റുതാരങ്ങൾ. അതിഥി വേഷത്തിൽ ദീപിക പദുക്കോണും ചിത്രത്തിന്റെ ഭാഗമായിരുന്നു.