ദീർഘനാളത്തെ ഇടവേളയ്ക്ക് ശേഷം പുതിയ ചിത്രവുമായി യുവ സംവിധായകൻ തരുൺ ഭാസ്‌ക്കർ ധാസ്യം. യുവാക്കൾക്ക് ആവേശം പകരുന്ന സിനിമകളിലൂടെ പ്രേക്ഷക കയ്യടി നേടിയ സംവിധായകന്‍ ഇത്തവണ പ്രേക്ഷകരിലേക്ക് 'കീട കോള' എന്ന ക്രൈം കോമഡി ചിത്രവുമായാണ് എത്തുന്നത്. പെല്ലിചൂപ്പുലു, ഈ നാഗറാണിക്കി എമൈന്ദി എന്നീ വമ്പന്‍ വിജയ ചിത്രങ്ങളിലൂടെ ശ്രദ്ധേയനായ തെലുങ്കിലെ യുവ സംവിധായകനാണ് തരുണ്‍ ഭാസ്‌ക്കര്‍ ധാസ്യം.
വി ജി സൈന്‍മയുടെ ബാനറില്‍ പ്രൊഡക്ഷന്‍ നമ്പര്‍ 1 ആയി പുറത്തിറങ്ങുന്ന ഈ ചിത്രത്തിന്റെ ലോഞ്ച് കഴിഞ്ഞ ദിവസം നടന്നു. നിര്‍മ്മാതാവ് സുരേഷ് ബാബു, നായകാനായ സിദ്ധാര്‍ത്ഥിന് പുറമെ, തേജ സജ്ജ, നന്ദു തുടങ്ങി നിരവധി യുവ സംവിധായകരും പ്രൗഢഗംഭീരമായ ലോഞ്ചിംഗ് ചടങ്ങില്‍ പങ്കെടുക്കുകയും സിനിമാ യൂണിറ്റിന് ആശംസകള്‍ അറിയിക്കുകയും ചെയ്തു. ചിത്രത്തിന്റെ ഷൂട്ടിംഗ് ഉടന്‍ ആരംഭിക്കും.
ശ്രീപദ് നന്ദിരാജ്, സായ്കൃഷ്ണ ഗഡ്വാള്‍, ഉപേന്ദ്ര വര്‍മ്മ, വിവേക് സുധാംശു, കൗശിക് നന്ദൂരി എന്നിവര്‍ ചേര്‍ന്ന് നിര്‍മ്മിക്കുന്ന ചിത്രം 2023ല്‍ പാന്‍ഇന്ത്യ റിലീസ് ചെയ്യും. ചിത്രത്തിലെ മറ്റ് അഭിനേതാക്കളുടെയും സാങ്കേതിക പ്രവര്‍ത്തകരുടെയും കൂടുതല്‍ വിവരങ്ങള്‍ വൈകാതെ തന്നെ പുറത്തുവിടുമെന്ന് അണിയറ പ്രവർത്തകർ അറിയിച്ചു.
തരുണ്‍ ഭാസ്‌ക്കര്‍ ധാസ്യം തന്നെയാണ് ചിത്രത്തിന്റെ രചനയും സംവിധാനവും നിര്‍വ്വഹിച്ചിരിക്കുന്നത്.