രജനീകാന്ത് ആരാധകർ കാത്തിരിക്കുന്ന ചിത്രം ജയിലറിലെ രണ്ടാമത്തെ ഗാനത്തിന്റെ പ്രൊമോയെത്തി. വൈറലായ 'കാവലാ' പാട്ടിന് പിന്നാലെ ആരാധകരെ ഇളക്കിമറിക്കുന്ന 'ഹുക്കും' എന്ന രണ്ടാം സിംഗിളിന്റെ പ്രോമോയാണ് പുറത്തിറങ്ങിയിരിക്കുന്നത്.
സെക്കൻഡ് സിംഗിള്‍ ജൂലൈ 17ന് റിലീസ് ചെയ്യാനിരിക്കെയാണ് പ്രിവ്യു റിലീസ് ചെയ്തിരിക്കുന്നത്. ചിത്രം മാസ് ആക്ഷൻ എന്റർടെയിനർ ആയിരിക്കുമെന്ന സൂചന നൽകുന്നതാണ് പ്രിവ്യു.
'ഏയ് ഇങ്ക നാൻ താ കിങ്, നാൻ വച്ച താ റൂൾസ്, അന്ത റൂൾസ് എൻ ഇഷ്ടത്തക്ക് അപ്പപ്പ മാറ്റിയിട്ടേ ഇരുപ്പേൻ. ഹുക്കും ടൈഗർ കാ ഹുക്കും എന്ന രജനി കാന്തിന്റെ മാസ് ഡയലോഗ് ഡെലിവറിയോടെയാണ് സെക്കൻഡ് സിംഗിളിന്റെ പ്രൊമോ വീഡിയോ നിർമാതാക്കൾ ട്വിറ്ററിലൂടെ പുറത്തുവിട്ടിരിക്കുന്ന്ത്. സംഗീത സംവിധായകൻ അനിരുദ്ധ് രവിചന്ദറാണ് ഹുകും ഒരുക്കിയിരിക്കുന്നത്. നിരത്തിവച്ചിരിക്കുന്ന തോക്കുകൾക്ക് അരികിലേക്ക് ഹുക്കും ടൈഗർ കാ ഹുക്കും എന്ന് പറഞ്ഞ് സ്റ്റൈൽ മന്നൻ വരുന്നതോടെയാണ് പ്രിവ്യു അവസാനിക്കുന്നത്.
ഒരാഴ്ച മുമ്പ്, ജയിലറിന്റെ ആദ്യ സിംഗിൾ കാവാലാ പുറത്തിറങ്ങിയിരുന്നു. രജനികാന്തിന്റെ സ്ക്രീൻ പ്രെസൻസും തമന്ന ഭാട്ടിയയുടെ കണ്ണഞ്ചിപ്പിക്കുന്ന നൃത്തച്ചുവടുകളും പ്രേക്ഷകരുടെ മനം കവരുന്നതായിരുന്നു. ഗാനം പുറത്തിറങ്ങി മണിക്കൂറുകൾ പിന്നിട്ടതും തമന്ന ഭാട്ടിയയുടെ ഹുക്ക് സ്റ്റെപ്പ് സോഷ്യൽ മീഡിയയിൽ പുതിയ ട്രെൻഡായി മാറിയിരുന്നു.
നെൽസൺ ദിലീപ്കുമാറിന്റെ സംവിധാനത്തിൽ രജനികാന്ത് പ്രധാനവേഷത്തിലെത്തുന്ന ജയിലർ ഈ വർഷം പ്രക്ഷേകർ ഏറ്റവും കൂടുതൽ കാത്തിരിക്കുന്ന ചിത്രങ്ങളിൽ ഒന്നാണ്. മോഹൻലാലും ഒരു പ്രധാന വേഷത്തിലെത്തുന്നുണ്ട്. ആക്ഷൻ ത്രില്ലർ ഗണത്തിലുളള ചിത്രത്തിൽ ജയിലറുടെ വേഷത്തിലാണ് സൂപ്പർ സ്റ്റാറെത്തുന്നത്. രജനികാന്തും തമന്നയും കൂടാതെ, വലിയൊരു താരനിരയാണ് ചിത്രത്തിൽ അണിനിരക്കുന്നത്. കന്നഡ സൂപ്പർസ്റ്റാർ ശിവ രാജ്കുമാർ, ബോളിവുഡ് താരം ജാക്കി ഷ്റോഫ്, രമ്യാ കൃഷ്ണൻ, യോഗി ബാബു, തുടങ്ങിയവരാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്.
'പടയപ്പ' എന്ന വന്‍ ഹിറ്റിന് ശേഷം രജനികാന്തും രമ്യാ കൃഷ്‍ണനും ഒന്നിക്കുന്ന ചിത്രം കൂടിയാണ് ജയിലര്‍. 'ബീസ്റ്റ്' എന്ന വിജയ് ചിത്രത്തിന് ശേഷം നെൽസൺ ദിലീപ് കുമാർ സംവിധാനം ചെയ്യുന്ന ചിത്രം കൂടിയാണ് ജയിലർ. ജയിലറിന്റെ കേരളത്തിലെ വിതരണ അവകാശം സ്വന്തമാക്കിയിരിക്കുന്നത് ശ്രീ ഗോകുലം മൂവീസാണ്. വിജയ് കാർത്തിക് കണ്ണനാണ് ഛായാഗ്രഹണം. നേരത്തെ, വിജയിയുടെ ലിയോയുടെ കേരളത്തിലെ വിതരണാവകാശവും ഗോകുലം മൂവീസ് സ്വന്തമാക്കിയിരുന്നു. ജയിലര്‍ ഓഗസ്റ്റ് 10ന് തിയറ്ററുകളിൽ എത്തും.