ഡോ. ബിജുവിന്റെ സംവിധാനത്തില്‍ ടൊവിനോ തോമസ്, നിമിഷ സജയന്‍ എന്നിവര്‍ കേന്ദ്രകഥാപാത്രങ്ങളായി എത്തുന്ന 'അദൃശ്യ ജാലകങ്ങള്‍' ക്യാരക്ടര്‍ പോസ്റ്റര്‍ പുറത്തിറങ്ങി. ഡോ. ബിജുവും ടൊവിനോയും ഒന്നിച്ചെത്തുന്ന ആദ്യ ചിത്രത്തില്‍ നായക കഥാപാത്രത്തിന് പേരില്ല എന്നതാണ് പ്രത്യേകത. ഒരു കുപ്രസിദ്ധ പയ്യന് ശേഷം നിമിഷയും ടോവിനോയും ഒരുമിച്ചെത്തുന്ന ചിത്രം കൂടിയാണ് അദൃശ്യ ജാലകങ്ങള്‍. ടൊവിനോ തോമസ് അവതരിപ്പിക്കുന്ന കഥാപാത്രത്തിന്റെ ചിത്രങ്ങള്‍ താരം സാമൂഹ്യ മാധ്യമങ്ങളില്‍ പങ്കുവെച്ചു.
നമുക്കു ചുറ്റുമുള്ള ആളുകളെ പ്രതിനിധീകരിക്കുന്ന കഥാപാത്രത്തെ മുന്‍നിര്‍ത്തി എത്തുന്ന ചിത്രം സര്‍റിയലിസം അടിസ്ഥാനമാക്കിയാണ് കഥപറയുന്നത്. കരിയറില്‍ ആദ്യമായാണ് ഇങ്ങനെയൊരു കഥാപാത്രത്തിന് ജീവന്‍ നല്കു‍ന്നതെന്നും ടൊവിനോ സോഷ്യല്‍ മീഡിയ കുറിപ്പില്‍ പറഞ്ഞു.
സാമൂഹിക പ്രതിബദ്ധതയുള്ള അര്‍ത്ഥവത്തായ ചിത്രമായിരിക്കും ഇത്. കാണികളുടെ ഹൃദയം കീഴടക്കുകയും, അവരെ എന്തിന്? എവിടെ? എന്തിന് വേണ്ടി ? എന്നീ ചോദ്യങ്ങളിലേക്ക് കൊണ്ടുപോവുകയും ചെയ്യുമെന്നും ടൊവിനോ പറയുന്നു. ചിത്രത്തില്‍ ഇന്ദ്രന്‍സും പ്രധാന കഥാപാത്രത്തെ അവതരിപ്പിക്കുന്നുണ്ട്.
എല്ലനാര്‍ ഫിലിംസിന്റെ ബാനറില്‍ രാധിക ലാലു നിര്‍മിക്കുന്ന ചിത്രത്തില്‍ ടൊവിനോ തോമസ് പ്രൊഡക്ഷന്‍സ്, മൈത്രി മൂവി മേക്കേര്‍സ് എന്നിവരും നിര്‍മാണ പങ്കാളികളാണ്. യദു രാധാകൃഷ്ണനാണ് ചിത്രത്തിന്റെ ഛായഗ്രഹണം ചെയ്യുന്നത്.