വരുൺ ധവാൻ - ജാൻവി കപൂർ ചിത്രം ബവാൽ ഒടിടിയിൽ റിലീസ് ചെയ്യാൻ നിർമാതാക്കൾ. ആമസോൺ പ്രൈം വീഡിയോയിലാണ് ചിത്രം റിലീസ് ചെയ്യുക. ജൂലൈയിൽ റിലീസ് ചെയ്യുമെന്ന് പ്രഖ്യാപിച്ചിട്ടുണ്ടെങ്കിലും തീയതി പുറത്തുവിട്ടിട്ടില്ല . വരുണും ജാൻവിയും ഒന്നിക്കുന്ന ആദ്യ ചിത്രമാണ് ബവാൽ. സംവിധാനം നിതേഷ് തിവാരിയാണ്.
ബവാൽ ഒരു പ്രണയചിത്രമായിരിക്കുമെന്നാണ് പോസ്റ്ററിൽ നിന്ന് വ്യക്തമാകുന്നത്. മൂന്ന് ഇന്ത്യൻ ലൊക്കേഷനുകളിലും അഞ്ച് യൂറോപ്യൻ രാജ്യങ്ങളിലുമായിട്ടായിരുന്നു ചിത്രീകരണം. ആകർഷകമായ കഥാ സന്ദർഭവും വരുണും ജാൻവിയും തമ്മിലുള്ള അതിശയകരമായ കെമിസ്ട്രിയുമാണ് ബവാലിനെ വ്യത്യസ്തമാക്കുന്നത്. പ്രൈം വീഡിയോയിലൂടെയുള്ള ചിത്രത്തിന്റെ പ്രീമിയർ ഇന്ത്യയിലും ലോകമെമ്പാടുമുള്ള പ്രേക്ഷകരിലേക്കും ബവാലിനെ എത്തിക്കുമെന്ന് വിശ്വസിക്കുന്നുവെന്നും സംവിധായകൻ നിതേഷ് തിവാരി വ്യക്തമാക്കുന്നു.
നദിയാദ്‌വാല ഗ്രാൻഡ്‌സൺ ബാനറിൽ സാജിദ് നദിയാദ്‌വാല എർത്ത്‌സ്‌കൈ പിക്‌ചേഴ്‌സുമായി ചേർന്നാണ് നിർമാണം. ബവാൽ 2023 ഏപ്രിൽ 7ന് റിലീസ് ചെയ്യാനായിരുന്നു ആദ്യം തീരുമാനിച്ചിരുന്നത്. പിന്നീട് ഈ വർഷം ഒക്ടോബർ 6 ലേക്ക് മാറ്റിവയ്ക്കാൻ തീരുമാനിച്ചിരുന്നു. എന്നാൽ ആ തീരുമാനങ്ങളെല്ലാം മാറ്റിയാണ് ഇപ്പോൾ ചിത്രം അടുത്ത മാസം ഒടിടിയിൽ റിലീസ് ചെയ്യുന്നുവെന്ന റിപ്പോർട്ട് വന്നത്. എന്നാൽ തീയേറ്ററിൽ റിലീസ് ചെയ്യാതെ ഒടിടിയിൽ റിലീസ് ചെയ്യുന്നതിന്റെ കാരണം വ്യക്തമല്ല