വർഷങ്ങൾക്ക് ശേഷം എന്ന ചിത്രത്തിന് ശേഷം വിനീത് ശ്രീനിവാസൻ സംവിധാനം ചെയ്യുന്ന പുതിയ ചിത്രം ഒരുങ്ങുന്നു. നടനും നിർമാതാവുമായ നോബിൾ തോമസ് നായകനാവുന്ന ചിത്രത്തിന്റെ കഥയും തിരക്കഥയും നോബിൾ തന്നെയാണ്.

ഹൃദയം, വർഷങ്ങൾക്ക് ശേഷം എന്നീ ചിത്രങ്ങൾക്ക് ശേഷം മെറിലാൻഡ് സിനിമാസിന്റെ ബാനറിൽ വിശാഖ് സുബ്രഹ്മണ്യം നിർമിക്കുന്ന ചിത്രത്തിൽ ഷാൻ റഹ്മാനാണ് സംഗീത സംവിധാനം. ഒരിടവേളയ്ക്ക് ശേഷമാണ് ഷാൻ റഹ്മാൻ - വിനീത് ശ്രീനിവാസൻ കൂട്ടുകെട്ട് വീണ്ടും ഒന്നിക്കുന്നത്.

തട്ടത്തിൻമറയത്ത് എന്ന് ഹിറ്റ് ചിത്രത്തിന് ക്യാമറ ചെയ്ത ജോമോൻ ടി ജോൺ വീണ്ടും വിനീതിനൊപ്പം ഒന്നിക്കുന്നുവെന്ന പ്രത്യേകതയും പുതിയ ചിത്രത്തിനുണ്ട്.

ആക്ഷന്‍ ത്രില്ലറായിരിക്കും ഈ ചിത്രമെന്നാണ് പുറത്തുവരുന്ന സൂചനകള്‍. ചിത്രത്തെക്കുറിച്ചുള്ള മറ്റു വിവരങ്ങൾ പുറത്തു വിട്ടിട്ടില്ല.

നേരത്തെ താനും ഷാൻ റഹ്മാനും വീണ്ടും ഒന്നിക്കുന്നതായി ദ ഫോർത്തിനോട് വിനീത് ശ്രീനിവാസൻ പറഞ്ഞിരുന്നു. ദ ഫോർത്തിന് നൽകിയ അഭിമുഖത്തിലായിരുന്നു തന്റെ അടുത്ത ചിത്രത്തിന്റെ സംഗീത സംവിധാനം നിർവഹിക്കുന്നത് ഷാൻ റഹ്മാനാണെന്ന് വിനീത് പറഞ്ഞത്. മിഥുൻ മാനുവൽ തോമസ് സംവിധാനം ചെയ്യുന്ന പുതിയ ചിത്രമായ ആട് 3 യുടെ സംഗീത സംവിധാനവും ഷാൻ റഹ്മാനാണ് നിർവഹിക്കുന്നത്.

ഏപ്രിൽ 11 നാണ് 'വർഷങ്ങൾക്കു ശേഷം' എന്ന ചിത്രം തീയേറ്ററുകളിൽ എത്തിയത്. ഫിലിപ്‌സ് ആണ് നോബിൾ അഭിനയിച്ച് തിയേറ്ററുകളിൽ എത്തിയ ചിത്രം.