'ഗുരുവായൂരമ്പല നടയില്‍' എന്ന സിനിമയുമായി ബന്ധപ്പെട്ട് നടന്‍ പൃഥിരാജിന് ഭീഷണിയുണ്ടെന്ന പ്രചാരണം അടിസ്ഥാന രഹിതമാണെന്ന് വിശ്വ ഹിന്ദു പരിഷത്ത്. പൃഥിരാജിനെതിരെ ഫേസ്ബുക്ക് പോസ്റ്റിട്ട പ്രതീഷ് വിശ്വനാഥ് സംഘടനയിൽ നിന്ന് നേരത്തെ പുറത്താക്കപ്പെട്ടയാളെന്ന് വിഎച്ച്പി വ്യക്തമാക്കി. സിനിമ വന്നതിനു ശേഷം അതില്‍ എന്തെങ്കിലും അപാകതയുണ്ടെങ്കില്‍ ആ സമയത്ത് സംഘടനയുടെ പ്രതികരണം ഉണ്ടാകുമെന്നും നിലവിലെ വിവാദങ്ങളിൽ സംഘടനയ്ക്ക് ബന്ധമില്ലെന്നും വിഎച്ച് പി അറിയിച്ചു.
ഗൂരുവായൂരമ്പല നടയില്‍ എന്ന വിപിന്‍ ദാസ് - പൃഥ്വിരാജ്- ബേസില്‍ ജോസഫ് ചിത്രം ഇന്നലെയാണ് പ്രഖ്യാപിച്ചത്. പിന്നാലെ പ്രതീഷ് വിശ്വനാഥ് ഫേസ്ബുക്കിലിട്ട പോസ്റ്റാണ് വിവാദത്തിന് ആധാരം. പോസ്റ്റിനെതിരെ സിനിമയുടെ നിർമാതാവും സംവിധായകനും രംഗത്തെത്തിയിരുന്നു. ഇതിനുപിന്നാലെയാണ് സംഭവത്തില്‍ വിശദീകരണവുമായി വിശ്വ ഹിന്ദു പരിഷത്ത് സംസ്ഥാന അധ്യക്ഷന്‍ വിജിതമ്പിയും, ജനറല്‍ സെക്രട്ടറി വി ആര് രാജശേഖരനും രംഗത്തെത്തിയത്.