മൂല്യവര്ധനയിലൂടെ കര്ഷകരുടെ ഉത്പന്നങ്ങള്ക്ക് മികച്ചവിലയും വിപണിയുമൊരുക്കാന് കൃഷി വകുപ്പ്. കേരളഗ്രോ ഓര്ഗാനിക്, കേരളഗ്രോ ഗ്രീന് എന്നീ ബ്രാന്റുകളില് കേരളത്തിലെ കര്ഷകരുടെ ഉത്പന്നങ്ങള് ലോകവിപണിയിലേക്കെത്തിക്കാനാണ് പദ്ധതിയെന്ന് കൃഷി മന്ത്രി പി പ്രസാദ് പറഞ്ഞു. ദേശീയ, അന്തര്ദേശീയ വിപണികളാണ് ലക്ഷ്യം. ഇതിനു മുന്നോടിയായി ജൈവ, ഉത്തമ കൃഷി രീതികളില് വിളയുന്ന ഉത്പന്നങ്ങളുടെ ലോഞ്ചിങ്ങ് നടന്നു.
കൊല്ലം ഭാഗ്യശ്രീ ഓര്ഗാനിക് ഫാം, പാലക്കാട് അട്ടപ്പാടിയിലെ അറ്റ്ഫാം കര്ഷക ഉത്പാദക കമ്പനി, തൃശൂര് അതിരപ്പള്ളി ട്രൈബല് വില്ലേജ് കര്ഷക ഉത്പാദക കമ്പനി എന്നിവിടങ്ങളില് നിന്നുള്ള 26 ഉത്പന്നങ്ങളാണ് കേരളഗ്രോ ഓര്ഗാനിക്, കേരളഗ്രോ ഗ്രീന് എന്നീ ബ്രാന്ഡുകളില് ആദ്യ ഘട്ടത്തില് വിപണിയിലെത്തിയത്. കേരളത്തിലെ എല്ലാ ജില്ലകളിലും കേരളഗ്രോ ബ്രാന്ഡ് ഷോപ്പുകള് വഴിയാണ് ഈ ഉത്പന്നങ്ങളുടെ പ്രാദേശിക വിപണനം നടത്താന് ഉദ്ദേശിക്കുന്നത്. ഗുണമേന്മ ഉറപ്പാക്കി വിഷരഹിത ഭക്ഷ്യഉത്പന്നങ്ങള് കേരളഗ്രോ ബ്രാന്ഡു വഴി പൊതുജനങ്ങളിലേക്ക് എത്തിക്കുകയാണ് ലക്ഷ്യം.
കേരളഗ്രോ ബ്രാന്ഡിനു കീഴില് പുതുതായി കേരളഗ്രോ ഓര്ഗാനിക്, കേരളഗ്രോ ഗ്രീന് എന്നിങ്ങനെ യഥാക്രമം ജൈവ ഉത്പന്നങ്ങളും ഉത്തമ കൃഷി രീതികള് അവലംബിച്ച് ഉത്പാദിപ്പിച്ച ഉത്പന്നങ്ങളുമാണ് വിപണിയിലെത്തിക്കുന്നത്. സംസ്ഥാനത്തെ കര്ഷകര് ഉത്പാദിപ്പിക്കുന്ന വിശ്വാസയോഗ്യമായ ജൈവ ഉത്പന്നങ്ങള് കൃഷിവകുപ്പ് പരിശോധിച്ച് ആധികാരികതയോടുകൂടി പൊതുവിപണിയില് ലഭ്യമാക്കുക എന്നതാണ് ബ്രാന്ഡിംഗിന്റെ ലക്ഷ്യം.
കമ്മീഷന് ഏജന്റുമാരോ ഇടനിലക്കാരോ ഇല്ലാത്തതിനാല് ഉത്പാദകര്ക്ക് മികച്ച വില ലഭിക്കും. ഗുണഭോക്താക്കള്ക്ക് വിശ്വാസ്യതയോടെ ന്യായവിലയ്ക്ക് പൊതുവിപണിയില് നിന്ന് ഗുണമേന്മയുള്ള ഉത്പന്നങ്ങള് വാങ്ങുകയും ചെയ്യാം. ഇപ്പോള് വിപണിയിലുള്ള വിശ്വാസ്യതയില്ലാത്ത ജൈവ ഉത്പന്നങ്ങളുടെ സ്ഥാനത്തേക്ക് ഈ ബ്രാന്ഡിനെ എത്തിക്കുകയാണ് ലക്ഷ്യം.
ആരോറൂട്ട് വാല്നട്ട്, ബനാന, ബദാം, ക്യാഷ്യു, പിസ്ത എന്നീ ഉത്പന്നങ്ങളാണ് കൊല്ലത്തെ ഭാഗ്യശ്രീ ഓര്ഗാനിക് ഫാം സര്ക്കാര് ബ്രാന്ഡിംഗോടെ പൊതുവിപണിയില് എത്തിക്കുന്നത്.
ചാമ, തിന, മില്ലറ്റ്, റാഗി പുട്ടുപൊടി, റാഗി ദോശ മിക്സ്, ബജ്റ പൊടി, ബജ്റ ദോശ മിക്സ്, മണിച്ചോളം, ബജ്റ ഗ്രെയിന്, റാഗി പൊടി, പനിവരക് മില്ലറ്റ് എന്നിവയാണ് പാലക്കാടെ ഫാര്മര് പ്രൊഡ്യൂസര് ഓര്ഗനൈസേഷനായ (എഫ്പിഒ) അറ്റ്ഫം (ATFAM FPO) ഉത്പാദിപ്പിക്കുന്നത്. ഈ ഉത്പന്നങ്ങളെല്ലാം കേരളഗ്രോ ഓര്ഗാനിക്കായി ബ്രാന്ഡ് ചെയ്തിട്ടുണ്ട്.
കുരുമുളക്, കുരുമുളക് പൊടി, കാപ്പിപ്പൊടി, വറുത്ത കാപ്പിക്കുരു, ഈസ്റ്റ് ഇന്ത്യന് ആരോറൂട്ട് സ്റ്റാര്ച്ച്, മഞ്ഞക്കൂവ പൊടി, കുടംപുളി, കുന്തിരിക്കം, മഞ്ഞള് എന്നിവയാണ് തൃശൂരിലെ അതിരപ്പള്ളി ട്രൈബല് വാലി എഫ്പിഒ ഉത്പാദിപ്പിക്കുന്നത്.
കൃഷിവകുപ്പിന്റെ മേല്നോട്ടത്തില് കൂടുതല് കര്ഷകരും കൃഷിക്കൂട്ടങ്ങളും ഇത്തരത്തില് കാര്ഷിക ഉത്പന്നങ്ങളുടെ ഓര്ഗാനിക്, ഗ്രീന് ബ്രാന്ഡിംഗിനു തയാറായിക്കൊണ്ടിരിക്കുകയാണ്. ഈ സാമ്പത്തികവര്ഷം 100 ഉത്പന്നങ്ങള് വിപണിയിലെത്തിക്കുകയാണ് ലക്ഷ്യം.