വനത്തോട് ചേര്‍ന്നുള്ള ജനവാസ മേഖലകളില്‍ താമസിക്കുന്നവര്‍ക്ക് എന്നും ശല്യക്കാരാണ് കാടിറങ്ങി വരുന്ന വന്യമൃഗങ്ങള്‍. വളര്‍ത്ത് മൃഗങ്ങളെ കൊന്ന് തിന്നുന്ന കടുവയും പുലിയുമെല്ലാം വില്ലന്‍ പട്ടികയിലാണ്. ആവശ്യത്തിന് ഭക്ഷണം ലഭിക്കാത്തതും, പ്രായാധിക്യത്താല്‍ വേട്ടയാടന്‍ കഴിയാത്തതുമടക്കം വന്യ മൃഗങ്ങള്‍ കാടിറങ്ങുന്നതിന് നിരവധി കാരണങ്ങളുണ്ട്. സംസ്ഥാനത്ത് ഏറ്റവും കൂടുതല്‍ കടുവകളുള്ള ജില്ലയിലാണ് വയനാട്. ജനവാസ മേഖലകളില്‍ നിന്നും പിടിയിലാകുന്ന കടുവകള്‍ക്കും പുലികള്‍ക്കുമായി വനംവകുപ്പ് ഒരുക്കിയതാണ് ബത്തേരി കുപ്പാടിയിലെ അഭയ പരിചരണ ആശ്വാസ കേന്ദ്രം. നിലവില്‍ രണ്ട് കടുവകളാണ് ഇവിടെ ഉള്ളത്. ലക്ഷ്മിയും കിച്ചുവെന്നും ജീവനക്കാര്‍ ഓമനപ്പേരിട്ട് വിളിക്കുന്ന കടുവകളില്‍ ഒരാള്‍ക്ക് പ്രായമായതിനാല്‍ വനത്തിലേക്ക് തുറന്ന് വിടാന്‍ കഴിയാത്ത അവസ്ഥയിലാണ്.
ഒരു കോടിയോളം രൂപ ചിലവഴിച്ച് കുറിച്യാട് റേഞ്ചില്‍ വനത്തിനുള്ളില്‍ 5 ഏക്കര്‍ ചുറ്റളവിലാണ് അഭയ കേന്ദ്രമുള്ളത്. ഒരേ സമയം നാല് കടുവകളെ പാര്‍പ്പിക്കാന്‍ കഴിയും. കടുവകളുടെ ആരോഗ്യത്തിന് അനുസരിച്ചുള്ള ഭക്ഷണമാണ് നല്‍കുന്നത്. സന്ദര്‍ശകര്‍ക്ക് ഇവിടെ അനുമതി ഇല്ല.