കഴക്കൂട്ടത്തെ സെന്റ് ആന്റണീസ് എല്‍ പി സ്‌കൂളില്‍ ആകെയുള്ളത് 68 കുട്ടികളാണ്. എന്നാല്‍ ഇന്ന് ഈ കൊച്ചു വിദ്യാലയത്തെ മറ്റു വിദ്യാലയങ്ങളില്‍ നിന്നും വേറിട്ടതാക്കുന്ന ഒന്നുണ്ട്. കടല്‍ കടന്നെത്തിയ ഏഴ് കുരുന്നുകള്‍. അവരാണ് ഇന്ന് ഈ വിദ്യാലയത്തിന്റെ മുഖമുദ്ര.
വിദ്യാലയത്തില്‍ പാറി പറന്ന് നടക്കുന്ന ഈ കുരുന്നുകള്‍ ഏഴ് പേരും അങ്ങ് അഫ്ഗാനിസ്ഥാനിസ്ഥാനില്‍ നിന്നുള്ളവരാണ്. കാര്യവട്ടം ക്യാമ്പസില്‍ ഗവേഷണത്തിനെത്തിയ അഫ്ഗാന്‍ സ്വദേശികളുടെ മക്കളാണ് ഇവര്‍. നാലാം ക്ലാസുകാരിയായ നാദിയായാണ് വിദ്യാലയത്തിലെത്തിയ ആദ്യ അഫ്ഗാനി വിദ്യാര്‍ത്ഥി.
ഭാഷയും, ഭക്ഷണവും, സാംസ്‌കാരവുമെല്ലാം വേറിട്ടതാണ്. എങ്കിലും, അറിവിന്റെ പുതിയ ഇടം തേടി കേരളത്തിലെത്തിയ ഈ കുരുന്നുകള്‍ ഇന്ന് ഏറെ സന്തുഷ്ടരാണ്. അക്കരെ നിന്നെത്തിയ ഇവര്‍ അധ്യാപകര്‍ക്കും, സഹപാഠികള്‍ക്കും ഏറെ പ്രീയപ്പെട്ടവരാണ്. അഫ്ഗാനിസ്ഥാനു പുറമേ തമിഴ്നാട്, ബംഗാള്‍, ഒഡിഷ, മാഹി എന്നിവിടങ്ങളില്‍ നിന്നുള്ള കുട്ടികളും ഇവിടെ പഠിക്കുന്നുണ്ട്.