തിരുവനന്തപുരം കോര്‍പ്പറേഷന് മുന്നില്‍ അപേക്ഷകള്‍ പുരിപ്പിച്ചു നല്‍കുന്ന ഒരു കൗണ്‍സിലറുണ്ട്. തമിഴ്നാട് കുഴിത്തുറ മുനിസിപ്പാലിറ്റിയിലെ ചെങ്ങന്‍മൂല വാര്‍ഡിലെ കൗണ്‍സിലര്‍ ജിഎസ് മിനികുമാരി. വര്‍ഷങ്ങളായി മിനികുമാരി ഇവിടെയുണ്ട്. ജീവിതമാര്‍ഗം എന്ന നിലയിലാണ് അവർ നഗരസഭയിലെത്തി അപേക്ഷ പൂരിപ്പിക്കാന്‍ തുടങ്ങിയത്. കൗണ്‍സിലർ എന്ന നിലയില്‍ കുഴിത്തുറ മുനിസിപ്പാലിറ്റിയില്‍ നിന്ന് ലഭിക്കുന്ന തുച്ഛമായ തുകയാണ് അവരെ തലസ്ഥാനത്തെത്തിച്ചത്.
തമിഴ്നാട്ടില്‍ കൗണ്‍സിലർക്ക് ഒരു മാസം ലഭിക്കുന്ന ഓണറേറിയം 600 രൂപ മാത്രമാണ്. എന്നാല്‍ തിരുവനന്തപുരം കോര്‍പ്പറേഷന് മുന്നില്‍ അപേക്ഷകള്‍ പൂരിപ്പിച്ച് നല്‍കുന്നതിലൂടെ ദിവസവും 600 രൂപയ്ക്ക് മുകളില്‍ ലഭിക്കുന്നതായി മിനികുമാരി പറയുന്നു.