മുഖ്യമന്ത്രി തർക്കത്തിന് പരിഹാരം കാണാൻ ശ്രമിക്കുന്ന കോൺഗ്രസ് ഹൈക്കമാന്‍ഡിന്റെ മുന്നിലേക്ക് ഡി കെ ശിവകുമാറും . തിങ്കളാഴ്ച അനാരോഗ്യം ചൂണ്ടിക്കാട്ടി യാത്ര മാറ്റിവച്ച ശിവകുമാർ ഡൽഹിക്കു പുറപ്പെട്ടു . സിദ്ധരാമയ്യയുമായുള്ള ഭിന്നത പരസ്യമാക്കി മാധ്യമങ്ങൾക്ക് മുന്നിൽ പ്രതികരണം നടത്തിയാണ് ഡികെ ശിവകുമാർ ഡൽഹിക്കു പോയത്.
" ആരെയും പിന്നിൽ നിന്ന് കുത്താനും ഭീഷണിപ്പെടുത്താനും ഞാനില്ല . എന്റെ ദൗത്യം ഞാൻ നിർവഹിച്ചു കഴിഞ്ഞു . ഭരണഘടന അനുസരിച്ച് പ്രവർത്തിക്കുന്ന എല്ലാവരെയും ചേർത്തുപിടിക്കുന്ന പാർട്ടിയാണ് കോൺഗ്രസ്. ജാതിയോ ഗ്രൂപ്പോ നോക്കി ആരെയും വേർതിരിച്ചു കാണാൻ ആവില്ല . എന്റെ പിന്തുണ 135 എംഎൽഎമാരാണ് . അവരെയെല്ലാം ഞാൻ ഒരേ കണ്ണ് കൊണ്ടാണ് കാണുന്നത് " - ഡി കെ ശിവകുമാര്‍ പറഞ്ഞു. ഭൂരിപക്ഷ എംഎൽഎമാരും തനിക്കൊപ്പമാണെന്ന സിദ്ധരാമയ്യയുടെ പരാമർശത്തിനെതിരെയായിരുന്നു ഡികെയുടെ പരാമർശം .
തിങ്കളാഴ്ച ഡികെയോടും സിദ്ധരാമയോടും ഒരുമിച്ചെത്താനായിരുന്നു ഹൈക്കമാൻഡ് നിർദേശിച്ചത് . എന്നാൽ സിദ്ധരാമയ്യക്കൊപ്പമുള്ള യാത്ര ഡികെ ഒഴിവാക്കുകയായിരുന്നു. തിങ്കളാഴ്ച വൈകിട്ട് ഡൽഹിയിൽ എത്തിയ സിദ്ധരാമയ്യ എഐസിസി നേതാക്കളുമായി ചർച്ച നടത്തിയിരുന്നു . ഇന്നും ചർച്ചകൾ തുടരും . കോൺഗ്രസ് അധ്യക്ഷൻ മല്ലികാർജുൻ ഖാർഗെ , രൺദീപ് സിങ് സുർജേവാല , കെ സി വേണുഗോപാൽ എന്നിവർ ശിവകുമാറുമായും സിദ്ധരാമയ്യയുമായും ഒറ്റയ്ക്കും ഒരുമിച്ചും വിഷയം ചർച്ച ചെയ്യും .
മുഖ്യമന്ത്രി പദവി വർഷ കണക്കിൽ വീതം വയ്ക്കുമ്പോൾ എത്ര വര്‍ഷം ,ആദ്യ അവസരം ആർക്ക് എന്നതാണ് തർക്ക വിഷയം . ആദ്യ അവസരം സിദ്ധരാമയ്യക്ക് നൽകിയാൽ പാർലമെന്റ് തിരഞ്ഞെടുപ്പ് കഴിഞ്ഞ ഉടൻ മുഖ്യമന്ത്രി കസേര വിട്ടു നൽകണമെന്നാണ് ഡികെയുടെ ആവശ്യം .
ഐ റ്റി , ഇ ഡി , സിബിഐ തുടങ്ങിയ ഏജൻസികളുടെ റഡാറിലുള്ള ഡികെ ശിവകുമാറിനെ മുഖ്യമന്ത്രിയാക്കുന്നതോടെ കേന്ദ്ര സർക്കാർ കർണാടക സർക്കാരിന്റെ പ്രതിച്ഛായ മോശമാക്കാൻ ഇറങ്ങിത്തിരിക്കുമെന്നാണ് ഹൈക്കമാൻഡിന്റെ വിലയിരുത്തൽ . ഭരണം കിട്ടിയ സ്ഥിതിക്ക് കർണാടകയിൽ നിന്ന് കൂടുതൽ ലോക്സഭാ സീറ്റുകൾ പ്രതീക്ഷിക്കുന്ന ദേശീയ നേതൃത്വത്തിന് ഇപ്പോൾ സിദ്ധരാമയ്യയാണ് മികച്ച ഓപ്‌ഷൻ .നേതാക്കളെ കാര്യം പറഞ്ഞു മനസിലാക്കി സമവായത്തിലെത്താനായാൽ വൈകിട്ടോടെ മുഖ്യമന്ത്രി പ്രഖ്യാപനം ഉണ്ടാകും .