ഗുജറാത്തിൽ തിങ്കളാഴ്ച സത്യപ്രതിജ്ഞ ചെയ്ത 17 അംഗങ്ങളിൽ 16 പേരും കോടീശ്വരന്മാരാണ്. പക്ഷെ അവരിൽ 35 ശതമാനത്തിലധികം പേരും 12-ാം ക്ലാസിനപ്പുറം പഠിച്ചിട്ടില്ല. അസോസിയേഷൻ ഫോർ ഡെമോക്രാറ്റിക് റിഫോംസ് (എഡിആർ) ആണ് കണക്കുകൾ പുറത്തു വിട്ടിരിക്കുന്നത്.

കാബിനറ്റ് മന്ത്രി ബൽവന്ത്‌സിങ് രജ്പുത്താണ് 372 കോടി രൂപയുടെ ആസ്തിയുമായി മുൻപന്തിയിലുള്ളത്. മധ്യപ്രദേശിലെ ബർകത്ത് ഡിസ്ട്രിക്ട് യൂണിവേഴ്‌സിറ്റിയിൽ നിന്ന് ബിരുദം പൂർത്തിയാക്കിയ ആളാണ് രജ്പുത്. ബച്ചുഭായ് ഖബാദാണ് ഏറ്റവും കുറഞ്ഞ ആസ്തിയുള്ള (92.85 ലക്ഷം രൂപ) മന്ത്രി. പത്താം ക്ലാസ്സാണ് ഇദ്ദേഹത്തിന്റെ യോഗ്യത. ഭക്ഷ്യ-സിവിൽ സപ്ലൈസ് മന്ത്രി ഭിഖു പർമർ, ടൂറിസം, പരിസ്ഥിതി, വനം, വകുപ്പ് മന്ത്രി മുലു ബേര, മന്ത്രി ജഗദീഷ് വിശ്വകർമ, മുകേഷ് പട്ടേൽ എന്നിവർ പത്താം ക്ലാസ് വരെ മാത്രമാണ് പഠിച്ചിട്ടുള്ളത്. എട്ടാം ക്ലാസ് വരെ പഠിച്ച ഹർഷ് സംഘവിയാണ് ഏറ്റവും കുറഞ്ഞ വിദ്യാഭ്യാസ യോഗ്യതയുള്ള മന്ത്രി. ആഭ്യന്തര സഹമന്ത്രിയായ സാംഘവിക്ക് 17 കോടി രൂപയുടെ ആസ്തിയാനുള്ളത്. മന്ത്രിസഭയിലെ 47 ശതമാനം മാത്രമാണ് ബിരുദം പൂർത്തിക്കായിട്ടുള്ളവർ.

24 ശതമാനം മന്ത്രിമാരും ക്രിമിനൽ കേസുകളിൽ ഉൾപ്പെട്ടവരാണെന്നത് മറ്റൊരു കാര്യം. 17 മന്ത്രിമാരിൽ നാലുപേരാണ് ക്രിമിനൽ കേസുകളിൽ ഉള്ളത്. ഫിഷറീസ്, മൃഗസംരക്ഷണ വകുപ്പ് സഹമന്ത്രി പർഷോത്തം സോളങ്കിക്കെതിരെ വഞ്ചനാക്കുറ്റവും വ്യാജരേഖ ചമച്ചതുമാണ് ചുമത്തിയിരിക്കുന്നതെന്ന് എഡിആർ റിപ്പോർട്ടിൽ പറയുന്നു. ഹർഷ് സംഘാവി, റുഷികേശ് പട്ടേൽ, രാഘവ്ജി പട്ടേൽ എന്നിവർക്കെതിരെ ചെറിയ കേസുകളും ഉണ്ട്.