തക്കാളി വില റെക്കോഡ് തകര്‍ക്കുന്ന സാഹചര്യത്തില്‍ മോഷണം സ്ഥിര സംഭവമാകുകയാണ്. പൂനെയിലെ ഒരു കര്‍ഷകനാണ് ഒടുവിലത്തെ ഇര. ശിശൂര്‍ താലൂക്കിലെ പിംപര്‍ഖേട് പ്രദേശവാസിയായ അരുണ്‍ ധോം എന്ന കര്‍ഷകന്‍ സ്വന്തം കൃഷിയിടത്തില്‍ നിന്നു വിളവെടുത്ത 400 കിലോ തക്കാളിയാണ് മോഷണം പോയത്. വിളവെടുത്ത ശേഷം 20 പെട്ടികളിലാക്കി വീടിനു പുറത്ത്‌ വാഹനത്തില്‍ സൂക്ഷിച്ചിരിക്കുകയായിരുന്നു. പരാതിയുടെ അടിസ്ഥാനത്തില്‍ പൂനെ പോലീസ് കേസെടുത്തിട്ടുണ്ട്.
മഹാരാഷ്ട്രയില്‍ തക്കാളി വിറ്റ് കോടീശ്വരനായ കര്ഷകന്റെ വാര്‍ത്തയും മധ്യപ്രദേശിലെ ഷഹ്ദോലില്‍ പാകം ചെയ്ത ഭക്ഷണത്തില്‍ രണ്ട് തക്കാളി ഉപയോഗിച്ചതിനെത്തുടര്‍ന്ന് ഒരു സ്ത്രീ ഭര്‍ത്താവിനെ തന്നെ ഉപേക്ഷിച്ചുവെന്ന വാര്‍ത്തകളുമൊക്കെ തക്കാളി വിലവര്‍ധനവിന്റെ പശ്ചാത്തലത്തില്‍ വന്നിരുന്നു. അതേ സമയം തക്കാളി കൃഷിയിലെ ലാഭം ആന്ധ്ര പ്രദേശിലെ കര്ഷകന്റെ ജീവനാപത്തായതും ചര്‍ച്ചയായിരുന്നു.
രാജ്യത്താകമാനം തക്കാളി വില ഉയര്‍ന്നതോടെയാണ് മോഷണവും ആരംഭിച്ചത്. 10 -20 രൂപയില്‍ വിപണയില്‍ ഉണ്ടായ തക്കാളിക്കിപ്പോള്‍ 80 മുതല്‍ 100 രൂപവരെയാണ് വില. ഉത്തരേന്ത്യയിലുണ്ടായ കനത്ത മഴയുടേയും മിന്നല്‍ പ്രളയത്തിന്റേയും പശ്ചാത്തലത്തിലാണ് തക്കാളി വില കുതിച്ചുയരുന്നത്.