ഓൺലൈൻ ഗെയിം വഴി പരിചയപ്പെട്ട പാകിസ്‍താൻ സ്വദേശിയായ പെൺകുട്ടിയെ ഇന്ത്യയിലേക്ക് കടത്തിയ യുവാവ് ബെംഗളൂരുവിൽ അറസ്റ്റിൽ. ഉത്തർപ്രദേശ് സ്വദേശി മുലായം സിങ് യാദവാണ് ബെംഗളൂരു പോലീസിന്റെ പിടിയിലായത്. പാകിസ്‍താൻ സ്വദേശിയായ 19 കാരിയെ ആണ് ഇയാൾ ബെംഗളൂരുവിൽ മതിയായ രേഖകളില്ലാതെ താമസിപ്പിച്ചത്. പെൺകുട്ടിയെ കസ്റ്റഡിയിലെടുത്ത പോലീസ് ബെംഗളൂരുവിലെ ഫോറീനേഴ്‌സ്‌ റീജിണൽ രജിസ്ട്രേഷൻ ഓഫീസിൽ ഏൽപ്പിച്ചു.
ഓൺലൈൻ ലുഡോ ഗെയിം പതിവായി കളിക്കുന്ന ഇരുവരും മാസങ്ങൾക്ക് മുൻപാണ് പരിചയപ്പെട്ടത്. സൗഹൃദം വളർന്ന് പ്രണയമായതോടെ പെൺകുട്ടി രാജ്യം വിട്ട് ഇന്ത്യയിലേക്ക് വരാനുള്ള തയ്യാറെടുപ്പുകൾ നടത്തി. വീട് വിട്ടിറങ്ങിയ പെൺകുട്ടി നേപ്പാളിൽ എത്തുകയായിരുന്നു. തുടർന്ന് നേപ്പാളിൽ എത്തിയ മുലായം സിങ് യാദവ് അവിടത്തെ ക്ഷേത്രത്തിൽ വെച്ച് പെൺകുട്ടിയെ വിവാഹം കഴിച്ചു.
കുറച്ച് ദിവസം നേപ്പാളിൽ കഴിഞ്ഞ ശേഷമായിരുന്നു ഇരുവരും ഇന്ത്യയിലേക്ക് എത്തിയത്. റോഡ് മാർഗമാണ് ഇരുവരും നേപ്പാളിൽ നിന്ന് ഇന്ത്യയിൽ എത്തിയത്. കസ്റ്റഡിയിലെടുക്കുമ്പോൾ പാസ്പോർട്ട്‌ മാത്രമായിരുന്നു പെൺകുട്ടിയുടെ കയ്യിൽ ഉണ്ടായിരുന്നത്. ബെംഗളൂരുവിൽ വാടക വീട് എടുത്ത് താമസം തുടങ്ങിയ ഇരുവരും ജോലി കണ്ടുപിടിക്കാനുള്ള ശ്രമത്തിലായിരുന്നു. ഇതിനിടയിലാണ് ഇവരെ പോലീസ് പിടികൂടുന്നത്.