കാഴ്ചയിൽ ഖാലിസ്ഥാനി വാദി ജർണയിൽ സിങ് ഭിന്ദ്രൻവാലയെ പോലെ തോന്നിക്കാൻ വാരിസ് പഞ്ചാബ് ദേ തലവനായ അമൃത്പാല്‍ സിങ് പ്ലാസ്റ്റിക്ക് സ‍ർജറി നടത്തിയതായി റിപ്പോർട്ട്. കഴിഞ്ഞ വർഷം ഓഗസ്റ്റിൽ ഇന്ത്യയിലേക്ക് മടങ്ങുന്നതിന് മുൻപ് ജോർജിയയിൽ പോയി ശസ്ത്രക്രിയ നടത്തിയെന്നാണ് വിവരം. അസമിലെ ദിബ്രുഗഡ് സെൻട്രൽ ജയിലിൽ കഴിയുന്ന സിങ്ങിന്റെ അനുയായികൾ ചോദ്യം ചെയ്യലിനിടെ ഇക്കാര്യം വെളിപ്പെടുത്തിയതായി ദി ഇന്ത്യൻ എക്സ്പ്രസ് റിപ്പോർട്ട് ചെയ്തു. രണ്ട് മാസത്തോളം അമൃത്പാല്‍ സിങ് ജോർജിയയിൽ താമസിച്ചതായാണ് റിപ്പോർട്ട്. ഇത് സംബന്ധിച്ച് കൂടുതൽ അന്വേഷണം നടത്തുമെന്നാണ് ഉദ്യോഗസ്ഥർ വ്യക്തമാക്കുന്നത്.
ഡൽഹിയിലെ കർഷക സമരത്തിനിടെ സിങ് സാമൂഹ്യ മാധ്യമങ്ങളിൽ നിരവധി പോസ്റ്റുകൾ ഇട്ടിരുന്നതായും ചിലരുമായി ബന്ധപ്പെട്ടിരുന്നതായും അറസ്റ്റിലായവർ പറഞ്ഞു. വാരിസ് പഞ്ചാബ് ദേ സംഘടനയ്ക്ക് പാകിസ്താനിൽ നിന്ന് ഫണ്ട് ലഭിച്ചെന്നും വ്യക്തിഗത കടങ്ങൾ തീർക്കാൻ അത് ഉപയോഗിച്ചതായും റിപ്പോർട്ടുണ്ട്.
മാതാവിന്റെ സഹോദരൻ ഹർജിത് സിങ്, ദൽജിത് സിങ് കൽസി എന്നിവരുൾപ്പെടെ സിങ്ങിന്റെ എട്ട് അനുയായികളാണ് അറസ്റ്റിലായത്. പഞ്ചാബി നടനും ആക്ടിവിസ്റ്റുമായ ദീപ് സിദ്ദുവിന്റെ മരണത്തെ തുടർന്ന് കഴിഞ്ഞ വർഷം ഓഗസ്റ്റിൽ അമൃത്പാല്‍ സിങ് പെട്ടെന്ന് എവിടെനിന്ന് പ്രത്യക്ഷപ്പെട്ടെന്നും വാരിസ് പഞ്ചാബ് ദേയുടെ നേതാവായി എങ്ങനെ ചുമതലയേറ്റെന്നും കണ്ടെത്താനുള്ള ശ്രമത്തിലാണ് ഇന്റലിജൻസ് വൃത്തങ്ങൾ.
മാർച്ച് 18നാണ് അമൃത്പാൽ സിങ് ഒളിവിൽ പോകുന്നത്. അതിനുശേഷം നിരവധി കഥകളും അഭ്യൂഹങ്ങളും പ്രചരിക്കുന്നുണ്ടെങ്കിലും അമൃത്പാൽ എവിടെയെന്ന് ആർക്കുമറിയില്ല. നേപ്പാളിലേക്ക് കടന്നുവെന്നടക്കം വാർത്തകൾ പുറത്തുവന്നു. എന്നാൽ ഒരു തവണ പോലും കൃത്യമായ വിവരം പങ്കുവയ്ക്കാന്‍ പോലീസിന് സാധിച്ചിട്ടില്ല.
അനുയായികളെ വിട്ടുകിട്ടാൻ അജ്നാല പോലീസ് സ്റ്റേഷൻ ആക്രമിച്ചതടക്കം ആറിലേറെ കേസുകളാണ് അമൃത്പാലിനെതിരെയുള്ളത്. ഫെബ്രുവരി 24ന് അമൃത്പാലും അനുയായികളും പോലീസ് സ്റ്റേഷൻ ആക്രമിച്ചതിനെത്തുടന്ന് നിരവധി പോലീസുകാർക്ക് പരുക്കേറ്റിരുന്നു. വധശ്രമം, പോലീസുകാരെ കൈയേറ്റം ചെയ്യൽ എന്നിങ്ങനെയുള്ള വകുപ്പുകൾ പ്രകാരമാണ് കേസ്. ഫെബ്രുവരി 16ന് ഒരാളെ തട്ടിക്കൊണ്ടുപോയി ആക്രമിച്ച കേസിലും അമൃത്പാല്‍ പ്രതിയാണ്.