ബിഹാറില്‍ നളന്ദ ജില്ലയിലെ കുല്‍ ഗ്രാമത്തില്‍, കളിക്കുന്നതിനിടെ 40 അടി താഴ്ചയുള്ള കുഴല്‍ കിണറ്റിലേക്ക് വീണ മൂന്ന് വയസുകാരനെ രക്ഷപെടുത്തി. ദേശീയ ദുരന്ത നിവാരണ സേനയുടെയും മറ്റ് രക്ഷാപ്രവര്‍ത്തന സംഘങ്ങളുടെയും അഞ്ച് മണിക്കൂർ നീണ്ട പരിശ്രമമാണ് ഫലം കണ്ടത്. ജെസിബിയുടെ സഹായത്തോടെ കുട്ടിക്ക് ഓക്‌സിജന്‍ എത്തിച്ചാണ് രക്ഷാപ്രവര്‍ത്തനങ്ങള്‍ നടത്തിയത്. കുട്ടിയുടെ നില തൃപ്തികരമാണെന്നും അടിയന്തര വൈദ്യ സഹായത്തിനായി ആശുപത്രിയിലേക്ക് എത്തിച്ചിരിക്കുകയാണെന്നും എഎന്‍ഐ റിപ്പോര്‍ട്ട് ചെയ്തു.
അപകടം സംഭവിച്ചത് ശുഭം കുമാര്‍ എന്ന മൂന്ന് വയസുള്ള കുട്ടിക്കാണ്. സമീപവാസിയായ കര്‍ഷകന്‍ കുഴിച്ച കുഴല്‍ക്കിണറിലാണ് കുട്ടി മണിക്കൂറുകളോളം അകപ്പെട്ടത്. കിണർ കുഴിച്ചെങ്കിലും വെള്ളം കിട്ടാത്തതിനെ തുടർന്ന് കർഷകൻ നിർമാണം ഉപേക്ഷിക്കുകയായിരുന്നു. കിണര്‍ മൂടാത്തതിനെ തുടര്‍ന്നാണ് അപകടമുണ്ടായതെന്ന് എന്‍ഡിആര്‍എഫ് സംഘം വ്യക്തമാക്കി.
'കാര്‍ഷികാവശ്യത്തിനായി കിണര്‍ കുഴിച്ചെങ്കിലും 40 അടി കുഴിച്ചിട്ടും വെള്ളം കാണാന്‍ കഴിയാത്തതിനെ തുടര്‍ന്ന് ഈ കിണര്‍ ഉപേക്ഷിച്ച് മറ്റൊരു കിണര്‍ കുഴിക്കുകയായിരുന്നു. എന്നാല്‍ ഇത് മൂടിയതുമില്ല.' നളന്ദ നഗര്‍ പഞ്ചായത്ത് വൈസ് പ്രസിഡന്റ് എഎന്‍ഐയോട് പറഞ്ഞു.
അടുത്തിടെ മധ്യപ്രദേശിലെ വിദിഷയിലെ കജാരി ബര്‍ഖേഡ ഗ്രാമത്തില്‍ സമാനമായ സാഹചര്യത്തില്‍ രണ്ടര വയസുകാരി കുഴല്‍ക്കിണറില്‍ വീണിരുന്നു. 20 അടി താഴ്ചയിലേക്ക് വീണ കുട്ടിയെ പുറത്തെടുക്കാനായെങ്കിലും പിന്നീട് മരിച്ചു. മധ്യപ്രദേശിലെ സെഹോര്‍ ജില്ലയിലും രണ്ടരവയസുള്ള കുട്ടിയും 300 അടി താഴ്ചയുള്ള കുഴല്‍ക്കിണറില്‍ വീണ് മരിച്ചത് അടുത്തിടെയാണ്.