ജാമിയ മിലിയ ഇസ്ലാമിയ സർവകലാശാലയിലെ വിദ്യാർഥികൾ തമ്മിലുണ്ടായ സംഘർഷത്തിൽ ഒരാൾക്ക് വെടിയേറ്റു. ഡൽഹി ഹോളി ഫാമിലി ആശുപത്രിയിൽ എത്തിയ വിദ്യാർഥിക്ക് നേരെ മറ്റൊരു വിദ്യാർഥി വെടിയുതിർക്കുകയായിരുന്നു. സർവകലാശാലയിൽ രണ്ട് വിഭാഗം വിദ്യാർഥികൾ തമ്മിലുണ്ടായ സംഘർഷത്തിന്റെ തുടർച്ചയാണ് ആശുപത്രിയിൽ സംഭവിച്ചതെന്ന് പോലീസ് വ്യക്തമാക്കി. നൗമാൻ അലി എന്ന വിദ്യാർത്ഥിയുടെ തലയ്ക്കാണ് വെടിയേറ്റത്. പരുക്ക് ഗുരുതരമാണെന്ന് ഡോക്ടർമാർ അറിയിച്ചു. തുടർ ചികിത്സയ്ക്കായി ഇയാളെ എയിംസ് ട്രോമ സെന്ററിലേക്ക് മാറ്റി.

ജാമിയ മിലിയയിൽ വിദ്യാർഥികൾ തമ്മിലുണ്ടായ സംഘർഷത്തിൽ പരുക്കേറ്റ കുറച്ചു വിദ്യാർഥികളെ ഹോളി ഫാമിലി ആശുപത്രിയിൽ പ്രവേശിപ്പിച്ചിരുന്നു. തലയ്ക്ക് പരുക്കേറ്റ് ആശുപത്രിയിൽ ചികിത്സയിലുണ്ടായിരുന്ന നോമാൻ ചൗധരി എന്ന സുഹൃത്തിനെ കാണാൻ എത്തിയതാണ് നൗമാൻ അലി. എമർജൻസി വാർഡിന് മുൻപിൽ കാത്തുനിന്ന എതിർ ചേരിയിലെ വിദ്യാർഥികളിൽ ഒരാളായ സലാൽ, അലിക്ക് നേരെ വെടിയുതിർക്കുകയായിരുന്നുവെന്ന് ആശുപത്രി അധികൃതർ പ്രസ്താവനയിലൂടെ അറിയിച്ചു.

വെടിവെപ്പില്‍ ആശുപത്രി ജീവനക്കാർക്കോ മറ്റ് രോഗികള്‍ക്കോ പരിക്കേറ്റിട്ടില്ല. സംഭവസ്ഥലത്ത് പരിശോധന നടത്തിവരികയാണെന്ന് പൊലീസ് അറിയിച്ചു.