അറബിക്കടലില്‍ രൂപം കൊണ്ട ബിപോര്‍ജോയ് ചുഴലിക്കാറ്റ് അടുത്ത 36 മണിക്കൂറിനുള്ളില്‍ തീവ്രമാകുമെന്ന് കാലാവസ്ഥാ നിരീക്ഷണ കേന്ദ്രം. രണ്ട് ദിവസത്തിനുള്ളില്‍ ഇത് വടക്ക്-വടക്കുപടിഞ്ഞാറ് ദിശയിലേക്ക് നീങ്ങുമെന്നും ഇന്ത്യന്‍ കാലാവസ്ഥാ വകുപ്പ് അറിയിച്ചു. കിഴക്കന്‍- മധ്യ അറബിക്കടലില്‍ സ്ഥിതി ചെയ്യുന്ന ചുഴലിക്കാറ്റ് കഴിഞ്ഞ ദിവസം രാത്രിയോടെ വടക്കോട്ട് നീങ്ങിയതായും കാലാവസ്ഥാ വകുപ്പ് അറിയിക്കുന്നു.
ഗോവയില്‍ പടിഞ്ഞാറ്-തെക്ക് പടിഞ്ഞാറ് ഭാഗത്ത് 840 കിലോമീറ്ററും മുംബൈ പടിഞ്ഞാറ്-തെക്ക് പടിഞ്ഞാറ് ഭാഗത്ത് 870 കിലോമീറ്ററും പോര്‍ബന്തറില്‍ തെക്ക്-തെക്ക് പടിഞ്ഞാറ് 870 കിലോമീറ്ററും ചുഴലിക്കാറ്റ് വ്യാപിച്ചു കിടക്കുകയാണ്. കര്‍ണാടക-ഗോവ-മഹാരാഷ്ട്ര തീരങ്ങളില്‍ മണിക്കൂറില്‍ 40-50 കിലോമീറ്റര്‍ വേഗതയിലും 60 കിലോമീറ്റര്‍ വരെ വേഗതയിലും കാറ്റ് വീശാന്‍ സാധ്യതയുണ്ടെന്നും മുന്നറിയിപ്പ് നല്‍കിയിട്ടുണ്ട്. തെക്കന്‍ അറബിക്കടലിന്റെ സമീപ ഭാഗങ്ങളില്‍ കടല്‍ പ്രക്ഷുബ്ധമാകാന്‍ സാധ്യതയുണ്ട്. കര്‍ണാടക-ഗോവ-മഹാരാഷ്ട്ര തീരങ്ങളില്‍ അടുത്ത അഞ്ച് ദിവസത്തേക്ക് കടല്‍ പ്രക്ഷുബ്ധമാകുമെന്നും മുന്നറിയിപ്പ് നല്‍കി.
അതേസമയം ഗുജറാത്ത് പോര്‍ബന്തര്‍ ജില്ലയിലെ തീരദേശത്തെ മത്സ്യത്തൊഴിലാളികള്‍ക്ക് ജാഗ്രതാ നിര്‍ദേശം നല്‍കി. മത്സ്യബന്ധനം പാടില്ലെന്നും ആഴക്കടലില്‍ നിന്ന് ഉടന്‍ മടങ്ങണമെന്ന നിര്‍ദേശവുമാണ് നല്‍കിയിരിക്കുന്നത്.