പ്രതിരോധ ഇടപാടുകളില്‍ അഴിമതി ആരോപിച്ച് നടത്തിയ ഒളിക്യാമറ ഓപ്പറേഷനുമായി ബന്ധപ്പെട്ട കേസില്‍ തെഹല്‍ക്കയ്ക്ക് തിരിച്ചടി. സൈനിക ഉദ്യോഗസ്ഥന് നല്‍കിയ അപകീര്‍ത്തി കേസില്‍ തെഹൽക്ക ഡോട്ട് കോമിനും മുൻ എഡിറ്റർ ഇൻ-ചീഫ് തരുൺ തേജ്പാൽ ഉൾപ്പെടെയുള്ളവർക്കും ഡൽഹി ഹൈകോടതി രണ്ടുകോടി പിഴ ചുമത്തി. 2001ൽ ‘ഓപ്പറേഷൻ വെസ്റ്റ്‌എൻഡ്‌’ എന്ന പേരിൽ നടത്തിയ ഒളിക്യാമറ ഓപ്പറേഷനിലൂടെ മേജർ ജനറലായിരുന്ന എം എസ് അലുവാലിയെ അപകീർത്തിപ്പെടുത്തിയെന്നാണ്‌ കേസ്‌.
തെഹല്‍ക്ക ഡോട്ട് കോമിന്റെ ഉടമകളായ ബഫലോ കമ്യൂണിക്കേഷന്‍സ്, തരുണ്‍ തേജ്പാല്‍, റിപ്പോര്‍ട്ടര്‍മാരായ അനിരുദ്ധ ബഹാല്‍, മാത്യൂ സാമുവല്‍ എന്നിവർ സൈനിക ഉദ്യോഗസ്ഥനായ മേജർ ജനറൽ എം എസ് അലുവാലിയയ്ക്ക് രണ്ട് കോടി നഷ്ടപരിഹാരം നൽകണമെന്ന് ജസ്റ്റിസ് നീന ബൻസാൽ കൃഷ്ണ ഉത്തരവിട്ടു. സത്യസന്ധനായ ഒരു ഉദ്യോഗസ്ഥനെ പൊതുമധ്യത്തിൽ താറടിച്ചുകാണിക്കുകയാണ് ചെയ്തത്. പ്രസിദ്ധീകരണത്തിന് 23 വർഷത്തിന് ശേഷം നൽകിയ മാപ്പപേക്ഷ അപര്യാപ്തവും അർത്ഥശൂന്യവുമാണെന്നും ജസ്റ്റിസ് നീന ബൻസാൽ കൃഷ്ണ ചൂണ്ടിക്കാട്ടി. കേസുമായി ബന്ധപ്പെട്ട വീഡിയോയില്‍ മാധ്യമങ്ങള്‍ കൃത്രിമം കാണിച്ചുവെന്നും പത്രത്തിന്റെ അഭിപ്രായം കൂട്ടിചേര്‍ത്തുവെന്നുമുള്ള പരാതിക്കാരന്റെ വാദങ്ങളും കോടതി ശരിവച്ചു.
പ്രതിരോധ ഇടപാടുകൾക്ക്‌ അനുമതി നൽകാൻ ഓർഡിനൻസ്‌ ഡയറക്ടർ ജനലറായിരുന്ന എം എസ് അലുവാലിയ കോഴ വാങ്ങുന്നുവെന്ന്‌ ആരോപിക്കുന്ന ഒളികാമറാ ദൃശ്യങ്ങൾ തെഹൽക്കാ.കോം വെബ്‌സൈറ്റും സീ ടിവി നെറ്റ്‌വർക്കുമാണ്‌ പുറത്തുവിട്ടത്‌. അതേസമയം, സീ ടെലിഫിലിം ലിമിറ്റഡിനെതിരായ അപകീർത്തി ആരോപണം തെളിയിക്കാനായില്ലെന്ന് കോടതി പറഞ്ഞു. സൈനിക ഇടപാടുകളില്‍ അഴിമതി ആരോപിച്ച് 2002 മാര്‍ച്ച് 13നാണ് തെഹല്‍ക്ക വിവാദമായ വാര്‍ത്ത പ്രസിദ്ധീകരിച്ചത്.
അലുവാലിയ സൈനിക സാമഗ്രി ഇറക്കുമതി ഇടപാടുകളിലെ ഇടനിലക്കാരനാണെന്നും 50,000 രൂപ കോഴ വാങ്ങിയതായും വാര്‍ത്തയില്‍ പരാമര്‍ശമുണ്ടായിരുന്നു. ഇത് തെളിയിക്കാൻ തെഹൽക്കക്ക് സാധിച്ചില്ല. വാർത്ത തനിക്ക് മാനഹാനിയുണ്ടാക്കിയെന്ന് വ്യക്തമാക്കിയാണ് അലുവാലിയ കോടതിയെ സമീപിച്ചത്.