അന്താരാഷ്ട്ര ലഹരിമരുന്ന് കടത്തിന്റെ വേരുകള്‍ കേരളത്തിലും. നവി മുംബൈയില്‍ നിന്നും കഴിഞ്ഞ ദിവസം പിടികൂടിയ 1476 കോടിയുടെ മയക്കുമരുന്ന് കടത്തിയതിന് പിന്നില്‍ മലയാളികള്‍. സംഭവവുമായി ബന്ധപ്പെട്ട് കാലടി ആസ്ഥാനമായ യമിറ്റോ ഇന്റര്‍നാഷണല്‍ ഫുഡ്സ് മാനേജിങ്ങ് ഡയറക്ടര്‍ വിജിന്‍ വര്‍ഗിസിനെ ഡയറക്ടറേറ്റ് ഓഫ് റവന്യൂ ഇന്റലിജന്‍സ് (ഡിആര്‍ഐ) കസ്റ്റഡിയിലെടുത്തു.

മെത്തഫെറ്റാമിന്‍ കൊക്കയ്ന്‍ എന്നിവയുള്‍പ്പെടെ മാരക മയക്കുമരുന്നുകളായിരുന്നു കഴിഞ്ഞ ദിവസം മുംബൈയില്‍ നിന്നും ഡിആര്‍ഐ പിടികൂടിയത്. ഓറഞ്ചുകള്‍ക്കിടയിലായിരുന്നു ലഹരി വസ്തുക്കള്‍ ഒളിപ്പിച്ചിരുന്നത്. കണക്കുകള്‍ പരിശോധിച്ചാല്‍ രാജ്യത്തെ ഏറ്റവും വലിയ ലഹരിമരുന്ന് വേട്ടയാണ് മുംബൈയില്‍ പിടികൂടിയത്.

സൗത്താഫ്രിക്കയില്‍ നിന്ന് കൊണ്ടുവന്ന ചരക്കുകളുടെ കൂട്ടത്തിലായിരുന്നു ലഹരിമരുന്നുകളുണ്ടായിരുന്നത്. നവി മുംബൈയിലെ കോള്‍ഡ് സ്റ്റോറേജുകളിലേക്ക് നീക്കിയ ചരക്കുകള്‍ വെള്ളിയാഴ്ചയായിരുന്നു ഡിആര്‍ഐ പരിശോധനയ്ക്ക് വിധേയമാക്കിയത്. വിശദമായ പരിശോധനയില്‍ വലന്‍സിയ ഓറഞ്ച് അടങ്ങിയ കാര്‍ട്ടണുകളിലാണ് വന്‍തോതില്‍ മയക്കുമരുന്ന് ഒളിപ്പിച്ച നിലയില്‍ കണ്ടെത്തിയത്. 198 കിലോഗ്രാം ഹൈ പ്യൂരിറ്റി ക്രിസ്റ്റല്‍ മെതാംഫെറ്റാമൈന്‍ (ഐസ്), 9 കിലോഗ്രാം ഹൈ പ്യൂരിറ്റി കൊക്കെയ്ന്‍ എന്നിവയാണ് കണ്ടെത്തിയത്. ഇവയക്ക് മൊത്തം 1,476 കോടി രൂപ വിലവരുമെന്നാണ് കണക്കാക്കുന്നത്.

മയക്ക് മരുന്ന് പിടിച്ചെടുത്ത സംഭവത്തിലെ കേരള ബന്ധം പുറത്ത് വന്ന സാഹചര്യത്തില്‍ സംസ്ഥാനത്തും പരിശോധനകള്‍ പുരോഗമിക്കുകയാണ്. യമിറ്റോ ഇന്റര്‍ നാഷണല്‍ ഫുഡ്സിന്റെ എറണാകുളത്തെ സ്ഥാപനത്തില്‍ എക്‌സൈസ് പരിശോധന നടത്തി. ഗോഡൗണ്‍ കോള്‍ഡ് സ്‌റ്റോറേജ് എന്നിവ സ്ഥിതി ചെയ്യുന്ന കാലടിയിലെ കെട്ടിടത്തിലായിരുന്നു പരിശോധന. പഴങ്ങള്‍ ഉള്‍പ്പെടെ വിശദമായി എക്‌സൈസ് സംഘം പരിശോധനയ്ക്ക് വിധേയമാക്കി.

യമിറ്റോ ഇന്റര്‍നാഷണല്‍ ഫുഡ്സിലൂടെ സംസ്ഥാനത്തേക്ക് ലഹരിമരുന്നുകള്‍ എത്തിയിട്ടുണ്ടോ എന്ന കാര്യം വിശദമായി പരിശോധിക്കാനാണ് എക്‌സൈസ് നീക്കം. പ്രാദേശികമായി ഉപയോഗിക്കാനല്ല കടത്തിയതെന്നാണ് വിലയിരുത്തല്‍.